«Qazaqtelekom» keńselerinde tintý júrip jatyr - agenttik

NUR-SULTAN. QazAqparat – «Qazaqtelekom» AQ ǵımarattarynda tintý is-sharalary júrip jatyr. Bul týraly Sybaılas jemqorlyqqa qarsy is-qımyl agenttiginiń tóraǵasy Oljas Bektenov aıtty, dep habarlaıdy QazAqparat tilshisi.

Búgin Májilistiń jalpy otyrysynan keıin tilshiler agenttik basshysynan «Qazaqtelekomdaǵy» tintý is-sharalary týraly suraq qoıdy.

«Árıne, tergeý amaldary júrip jatyr. Osy oraıda tintý is-sharalaryn júrgizý kerek, onyń ishinde «Qazaqtelekom» AQ-nyń Almaty men elordadaǵy keńseleri bar. Belsendi tergeý is-qımyldaryn keshe ǵana bastadyq. Jańa málimetter bolsa, biz ony jarııalaımyz», - dedi Oljas Bektenov.

Budan buryn habarlanǵandaı, Sybaılas jemqorlyqqa qarsy qyzmet laýazymdyq ókilettikterin asyra paıdalaný jáne «Qazaqtelekom» AQ-nyń qarajatyn asa iri kólemde urlaý faktileri boıynsha qylmystyq isti tergeýde.

Atalǵan qylmystardy jasady degen kúdikpen Qaırat Satybaldyuly ustalyp, ýaqytsha ustaý ızolıatoryna qamaldy.