Qazaqtelekom Kcell aktsııalaryn ıemdense, tarıfterdiń ózgermeıtinine kepil joq - depýtat
ASTANA. QazAqparat - QR Parlamenti Májilisiniń depýtaty Maıra Aısına "Qazaqtelekom" AQ "Kcell" uıaly baılanys operatorynyń 75% aktsııasyn satyp alýyna qatysty pikir bildirdi, dep habarlaıdy QazAqparat tilshisi.
"Eń bastysy, bizdi Úkimet pozıtsııasy qyzyqtyryp otyr, sebebi eki apta buryn Úkimetke depýtattyq saýal joldanǵan bolatyn. Bul týraly uzaq ýaqyttan beri aıtylyp keledi, oǵan núkte qoıatyn kez jetti. Bizdi de uıaly baılanys naryǵyndaǵy shoǵyrlaný alańdatady. Eger "Qazaqtelekom" Kcell aktsııalaryn satyp alsa, jalpy naryq tutynýshylarynyń shamamen 65 protsentin ıemdenedi", - dedi Maıra Aısına "Atameken" UKP jıynynda jýrnalısterge bergen suhbatynda.
Sondaı-aq, depýtat tarıfterdi ózgertýde de tutynýshylar múddesin oılaý kerektigin basa aıtty.
"Qazirgi ýaqytta bizdi tutynýshylar múddesi de alańdatady. Olar bizdiń saılaýshylarymyz, biz olardyń atynan sóılep otyrmyz. Endi Qazaqtelekom men Úkimettiń naqty ustanymdaryn, sheshimniń neden týyndaǵanyn bilý qajet. Eger naryqta úsh nemese odan da kóp oıynshy bolsa, teńgerim jaǵynan másele týyndamaıdy. Al eger bul kelisimge jol berilse, Qazaqstan naryǵynda eki oıynshy (Bılaın jáne Altel-Tele2) qalady jáne tarıfterdiń ózgermeýine eshkim kepildik bere almaıdy. Sondyqtan, UKP janyndaǵy Keńes atynan bul máselege óte muqııat qaraýdy, tutynýshy múddesin aldyńǵy kezekke qoıýdy talap etemiz", - dedi depýtat.
Buǵan deıin "Qazaqtelekom" aktsıonerlik qoǵamynyń "Kcell" uıaly baılanys operatorynyń 75% aktsııasyn satyp alatyny týraly habarlanǵan edi.
