Qazaqtelekom iD TV-diń 100 000-shy abonentin qosty
ASTANA. 11 maýsym. QazAqparat - «Qazaqtelekom» AQ iD TV-diń 100 000-shy paıdalanýshysyn qosty. Tanymal qyzmettiń osy eleýli sandaǵy abonenti astanalyq Venera Myrzabekova boldy.
iD TV qyzmeti 2009 jyly Astanada paıdalanýǵa berildi. Bul qyzmet tsıfrly beıne sapasy men tamasha stereodybysty qamtamasyz etedi. Munymen birge, IP-hattama boıynsha televızııalyq sıgnaldy berý tehnologııasy abonentke óz betinshe qyzmetter jıyntyǵyn basqarýǵa múmkindik beredi: telearnalar paketin tańdaý, olardy toptaý, qosymsha qyzmetterge qosylý, fılmderge tapsyrys berý jáne teledıdar ekranynan habarlardyń elektrondy baǵdarlamasyn qaraý. Bir sózben aıtqanda, iD TV qyzmetinde ınternet jelisiniń ınteraktıvtiligimen kabeldik telearnanyń artyqshylyqtary úılesken.
iD TV qaladaǵymen qatar, aýdan ortalyqtary jáne aýyldyq eldi mekenderdiń turǵyndary úshin qoljetimdi. Kompanııa sym jelileri boıynsha sapasy joǵary telearna qyzmetin aýyldyq jerlerge kórsetetin respýblıkadaǵy jalǵyz operator bolyp tabylady. Qazirgi ýaqytta aýdan ortalyqtary men aýyldaǵy turǵyndar oblystardaǵy iD TV paıdalanýshylarynyń jalpy sanynyń 47 paıyzyn (Astana men Almaty qalalaryn qospaǵanda) jáne respýblıka boıynsha iD TV paıdalanýshylarynyń jalpy sanynyń 24 paıyzyn quraıdy.
