«Qazaqtelekom» halyq sany 50 myń adamnan asatyn iri qalalarda LTE jelisin ornatýdy merzimnen buryn aıaqtady
Bul týraly «Nur Otan» partııasynyń Májilistegi fraktsııasy janyndaǵy ekonomıkalyq saıasat boıynsha keńestiń birlesken otyrysynda qatysýshylarǵa «Qazaqtelekom» AQ basqarmasynyń tóraǵasy Qýanyshbek Esekeev habarlady.
2012-2013 jyldary «Qazaqtelekom» AQ jelini respýblıkanyń alty oblys ortalyǵynda: Qaraǵandy, Shymkent, Óskemen, Aqtaý, Aqtóbe, Atyraý, sondaı-aq Astana, Almaty qalalary men olardyń mańyndaǵy eldi mekenderde ornatty. Qalǵan segiz ákimshilik ortalyqta ilki kommertsııalyq aımaqtar iske qosyldy. 2014 jyly Túrkistan jáne Kentaý qalalarynda 4G jelisin iske qosýdan keıin kompanııa 50 myńnan astam turǵyny bar qalalarda jelini ornatý boıynsha josparyn merzimge deıin aıaqtady. 2018 jyldyń 1 qańtaryna deıin 4G jelisiniń qyzmeti Qazaqstannyń barlyq aýdan ortalyqtarynda paıda bolýy tıis. «Qazaqtelekom» AQ enshiles kompanııasy «Altel» elimizde tórtinshi býyn jelisin engizýmen aınalysýda.
Búginde 4G qyzmetimen Qazaqstannyń 200 eldi mekeni qamtamasyz etilgen, mundaǵy turǵyndardyń jalpy sany shamamen 10,6 mln. adamdy quraıdy, bul eldegi halyq sanynyń 62 paıyzyn quraıdy.
«Aǵymdaǵy jyldyń sońyna deıin 2,5 myńnan astam bazalyq stansany paıdalanýǵa berý josparlanyp otyr. 2017 jylǵa deıin biz taǵy 142 aýdan ortalyǵyn bul qyzmet túrimen qamtamasyz etýdi josparlaýdamyz», - dep habarlady Qýanyshbek Esekeev. «Qazaqtelekom» AQ tehnologııalyq damytýdyń kelesi qadamdary retinde daýysty 4G LTE jelisi arqyly jibere alatyn VoLTE tehnologııasyn engizý múmkindigin qarastyryp, sondaı-aq LTE-Advanced tehnologııasyn engizýge daıyndalý ústinde.
