Qazaqtelekom Ǵalamtor jelisine shyǵý jyldamdyǵyn arttyrady
ASTANA. QazAqparat - 1 shildeden bastap «Qazaqtelekom» AQ «MegalineHitOptima» tarıftik josparyna sáıkes ǵalamtor jyldamdyǵyn 2 ese arttyrady.
«Qazaqtelekom» AQ josparyna saı tarıfti tómendetýdi jáne 2014 jyly ǵalamtorǵa qoljetimdilik qyzmetin tehnıkalyq jaǵynan jaqsartýdy kózdep otyr.
Atap aıtqanda, «MegalineHitOptima» tarıftik josparyn paıdalanýshylardyń ishki resýrsqa qoljetimdilik jyldamdyǵy 2 Mbıt/s-ten 4 Mbıt/s deıin kóteriledi. Alaıda abonenttik tólem sol qalpynda qalmaq. «Bul shara Ǵalamtor jelisindegi qazaqstandyq segmenttiń damýyna baǵyttalǵan. «MegalineHitOptima» tarıftik jospary boıynsha jyldamdyqtyń ulǵaıýy ishki resýrstaǵy trafık kólemin kóbeıtýdşi qamtamasyz etedi», - dedi Baılanys jáne aqparat agenttiginiń baılanys salasyndaǵy tarıfterdi retteý basqarmasynyń jetekshisi Rýslan Aımahanov. 2014 jylǵa arnalǵan josparda kúzge qaraı jyldamdyq pen «MegalineStart» tarıftik jospary boıynsha kiris trafık kólemin ulǵaıtý qarastyrylǵan. Bul jaǵdaıda da abonenttik tólem ózgerissiz qalady. Zańdy tulǵalar úshin lımıtsiz tarıftik josparlardyń jańa parametrleri iske qosylady.
2014 jyldyń tórtinshi toqsanynda baılanys operatorlary úshin ǵalamtor jelisine qoljetimdilik qyzmetiniń qunyn 10%, sondaı-aq belgilengen baılanystyń ózge operatorlarynyń «Qazaqtelekom» AQ jelisine qosylý qyzmetiniń qunyn 5% tómendetý josparlanǵan.
