«Qazaqtelekom» byltyr qansha tabys tapqany belgili boldy
ASTANA. KAZINFORM — «Qazaqtelekom» AQ 2025 jyldyń qorytyndysy boıynsha 147 mlrd teńge kóleminde taza paıda tapty. Bul týraly kompanııa basqarma tóraǵasy Baǵdat Mýsın «Samuryq-Qazyna» AQ Qoǵamdyq keńesiniń otyrysynda málim etti.
Onyń aıtýynsha, kompanııanyń jalpy kirisi jospardan asyp, 587 mlrd teńgeni qurady. Bul baılanys qyzmetterine turaqty suranystyń bar ekenin jáne kommertsııalyq strategııanyń tıimdiligin dáleldeıdi.
Byltyr «Qazaqtelekomnyń» naqty shyǵyndary jospardan 2,6%-ǵa tómen bolyp, 508,9 mlrd teńgeni quraǵan.
— Taza paıda 147 mlrd teńgege jetti. Bir rettik faktorlardy esepke almaǵannyń ózinde negizgi bıznes tabystylyǵynyń senimdi ósimi baıqalady. Qaryz júktemesi de qolaıly deńgeıde saqtalyp otyr, — dedi Baǵdat Mýsın.
Sonymen qatar kompanııa bıýdjetke 89,2 mlrd teńge kóleminde salyq tólegen. Infraqurylymdy damytýǵa 200 mlrd teńgeden astam ınvestıtsııa baǵyttalǵan.
Abonenttik bazaǵa 1,9 mln turaqty ınternet qoldanýshysy, 8,7 mln mobıldi baılanys abonenti jáne 1,2 mln TV+ qyzmetin paıdalanýshy kiredi. Kompanııa 15 240 memlekettik mekemeni, 80 myń bıznes uıymdy, 3 850 mektepti jáne 2 720 medıtsınalyq mekemeni baılanyspen qamtamasyz etip otyr.
Buǵan deıin «Qazaqtelekom» kompanııasy kelesi jyldyń ekinshi toqsanynda Pavlodardaǵy derekterdi óńdeý habynda alǵashqy 50 MVt-tyq JI-derekter ortalyǵyn salatynyn jazǵanbyz.
