Qazaqtelekom baılanys jelisindegi aqaýǵa qatysty jaǵdaıdy túsindirdi

ASTANA. KAZINFORM — Búgin saǵat 10:00–den bastap qazaqstandyqtar birqatar servıske, onyń ishinde egov.kz memlekettik resýrsyn ashý kezinde qıyndyqtarǵa tap boldy. «Qazaqtelekom» AQ osy jaǵdaıǵa túsinikteme berdi.

«Qazaqtelekom» bul problemalar kompanııa jelisiniń jumysymen baılanysty emes ekenin aıtyp, birneshe dáıek keltirdi.

1. TOIT málimetterine súıensek, saǵat 10-nan bastap «UAT» AQ-ǵa qol jetimdiliktiń buzylyp, kesteden aýytqyǵanyn kóremiz. Bilmeıtinder úshin UAT prefıksteri TOIT trafık almasý núktesindegi barlyq operatorlar úshin qol jetimdi. Operatorlar men TOIT arasynda aralyq operatorlar joq jáne trafıkti tikeleı bólisý múmkindigi bar. https://lg-ix.sts.kz/#nitec_astana siltemesi arqyly looking glass-te trafıkti ózińiz kóre alasyz. Astana qalasyn tańdap, kezektilik boıynsha 6-shy kesteni qaraýǵa bolady.

2. Bul rette Reseıde «Bas radıojıilik ortalyǵynyń» jalpyǵa ortaq paıdalanylatyn baılanys jelisin monıtorıngileý jáne basqarý ortalyǵy (JOPB JMB) «Megafon» kompanııasynyń eýropalyq jelilermen sheteldik túıisýlerinde aqaý bolǵanyn habarlady. MegaFonnyń resmı málimdemesinde aqaýlar sheshilgeni kórsetilgen.

3. Osy kezeńde bizdiń jelide aqaýlar tirkelgen joq. Sonymen qatar, Qazaqtelekomnyń Eýropa men Azııadaǵy bizdiń qatysý núktelerimizdiń arqasynda tranzıttik operatorlardy aınalyp ótýge baılanysty problemalardy jedel sheshýge múmkindigi bar. Eger tranzıttik operatorlarda problema týyndasa, biz operatorlardyń aplınk (tranzıttik) aqaýlarynyń áserin azaıtý jáne tutynýshylarymyz úshin qyzmetterdiń turaqtylyǵyn saqtaý úshin kiris trafıgin qaıta baǵyttaımyz. Osy núktelerde biz tranzıttik operatorlardy aınalyp ótý úshin trafıkti Eýropadaǵy avtonomdy operatorlyq júıelermen jáne BigTech kompanııalarymen (AS) tikeleı almasamyz.

— Barshańyzǵa naqty derekke mán berip, alyp-qashpa áńgimelerge júginbeýdi suraımyz. Bizdiń komanda jaǵdaıdy baqylap otyr, ári jeliniń turaqty jumysyn qamtamasyz etý úshin qoldan kelgendi aıanyp qalmaımyz. Jergilikti qyzmetterge nemese úshinshi tarap operatorlaryna qatysty máselelerge biz jaýap bere almaımyz, alaıda shamamyz kelgenshe dıalog quryp, kómek kórsetýge daıynbyz, — dep atap ótti «Qazaqtelekom» AQ Ortalyq apparatynyń ınnovatsııalar jónindegi bas dırektory Nurlan Meıirmanov.

Aıta ketsek, búgin birneshe memlekettik portaldyń jumysynan tehnıkalyq aqaý shyqty.

Keıinnen Tsıfrlyq damý mınıstrligi uıaly baılanys pen Meta (Facebook, Instagram, WhatsApp) servısterine qoljetimdilik boıynsha qazirgi máseleler ǵalamdyq sıpatqa ıe ekenin málim etti.

Budan bólek, avıatsııa komıteti áýejaı jolaýshylaryna eskertý jasady.