«Qazaqtelekom» AQ Basqarma tóraǵasy Q. Esekeev astanalyq stýdenttermen kezdesti
ASTANA. 8 jeltoqsan. QazAqparat /Gúlmıra Alıakparova/ - «Qazaqtelekom» AQ-nyń Basqarma tóraǵasy Qýanyshbek Esekeev Astanadaǵy S.Seıfýllın atyndaǵy Qazaq agrotehnıkalyq ýnıversıtetiniń stýdentterimen kezdesti.
Bul týraly ýnıversıtettiń baspasóz qyzmetinen habarlady.
Q.Esekeevpen júzdesken «Radıotehnıka, elektronıka jáne telekommýnıkatsııalar» mamandyǵynda bilim alatyn stýdentterdi negizinen, Wi-Fi jáne Wi-Max tehnologııasynyń damýy, aktsıonerlik qoǵamnyń sheteldik kásiporyndarmen yqpaldastyǵy máseleleri qyzyqtyrdy. Odan bólek «Qazaqtelekom» AQ-da óndiristik tájirıbe nelikten aqyly túrde ótkiziletindigi tóńireginde áńgime qozǵalyp, keleshekte abıtýrıentterge grant alý múmkindigimen úzdik oqıtyn oqýshylar arasynda baıqaý ótkizip turý usynysy jasaldy.
Basqarma tóraǵasy sondaı-aq, búgingi eńbek naryǵynda ınjener mamandyǵyna suranystyń kóptigin jáne olar ákimshiliktik-kommýtatsııalyq qurylǵylar men telekommýnıkatsııalyq júıelerdi baǵdarlamalaý elementterin jetik bilýi qajettigin atap ótti.
Keleshekte QazATÝ rektory A. Kúrishbaev pen «Qazaqtelekom» AQ-nyń Basqarma tóraǵasy Q.Esekeev ekijaqty yntymaqtastyq memorandýmyna qol qoıý týraly kelisti. Memorandým maqsaty - bilim jáne tájirıbe almasý, sonymen qatar aqparattyq jáne telekommýnıkatsııalyq tehnologııalar salasyndaǵy mamandar daıyndaýda sapaly bilimdi qamtamasyz etý. Sondaı-aq memorandým ýnıversıtettiń ǵımarattary men jataqhanalarynda ınternet baılanysynyń sapasyn jaqsartýdy kózdeıdi.
