«Qazaqtelekom» AQ 2014 jyldyń 1 qańtarynan bastap telekommýnıkatsııa qyzmetterine tarıfterdi tómendetpek
ALMATY. 26 jeltoqsan. QazAqparat - «Qazaqtelekom» AQ aýyldyq jerlerdegi jeke tulǵalar úshin telekommýnıkatsııa qyzmetterine qoljetimdilik deńgeıin kóterý maqsatynda tarıfterdi tómendetý jóninde is-sharalar ótkizýde, dep habarlaıdy kompanııanyń baspasóz qyzmetinen.
Osylaısha, lımıtsiz negizde jergilikti jáne qalaaralyq telefon baılanysy qyzmetterin qamtıtyn «Seniń Qazaqstanyń» qyzmetter paketi boıynsha aı saıynǵy tólem 200 teńgege tómendetilip, QQS qosa alǵanda 1 290 teńgeni quraıdy. Lımıtsiz negizde qalaaralyq telefon baılanysy jáne symsyz keń jolaqty ǵalamtor jelisine kirý qyzmetin qamtıtyn «Super EV-DO» qyzmetter paketiniń aı saıynǵy tólemi 20%-dan astam tómendetildi.
Sonymen qatar, lımıtsiz negizde qalaaralyq telefon baılanysy jáne Megaline/ iD Net qyzmetterin qamtıtyn paketter boıynsha qala jáne aýyldyq jerlerdiń jeke tulǵalary úshin tarıftik josparlardyń jańa jelisi engizilgen. Qoldanystaǵy tarıfter týraly naqty aqparatpen www.telecom.kz saıtynan tanysýǵa bolady.
