«Qazaqtelekom» abonentterine modemdi jalǵa alýdy mindettegen - Agenttik

ASTANA. QazAqparat – «Qazaqtelekom» abonentterine ınternetke qosylýǵa arnalǵan qosymsha jabdyqty, ıaǵnı modem qurylǵysyn jalǵa alýdy mindettegen, dep habarlaıdy QazAqparat Básekelestikti qorǵaý jáne damytý agenttigine silteme jasap.

Básekelestikti qorǵaý jáne damytý agenttiginiń Astana qalasy boıynsha departamenti «Qazaqtelekom» AQ-nyń «iD Net» qyzmeti boıynsha ınternetke kirý úshin ONT qurylǵylaryn jalǵa berý boıynsha qyzmetin tekserý barysynda abonentterge qosymsha jabdyqty (modem) jalǵa berý belgileri (mindetti túrde) bar ekenin anyqtady.

Aktsıonerlik qoǵamnyń aqparaty boıynsha G-PON jelisiniń OLT statsıonarlyq jabdyǵy men abonentterge aktsıonerlik qoǵam mindetti túrde jalǵa beretin klıenttik jabdyq arasynda árbir óndirýshi OMCI ózara is-qımylynyń menshikti (avtorlyq quqyqpen qorǵalǵan) hattamasyn qoldanady. Osylaısha, klıent statsıonarlyq óndirýshimen birdeı jabdyqqa ıe bola otyryp, ony paıdalana almaıdy, óıtkeni aktsıonerlik qoǵam óziniń jabdyqtaryn «abonentke mindetti túrde jalǵa beredi».

Aktsıonerlik qoǵamnyń bul áreketterimen klıenttiń ınternet jelisine qol jetkizý qyzmetterin alý úshin óziniń sertıfıkattalǵan abonenttik qurylǵylaryn paıdalaný quqyǵyna qatysty 24.02.2015 jylǵy №171 baılanys qyzmetterin kórsetý qaǵıdalarynda belgilengen normalary buzyldy.

Demek, aktsıonerlik qoǵamnyń is-áreketterinde Departament básekelestikti qorǵaý salasyndaǵy zańnamany buzý belgilerin, atap aıtqanda tutynýshylardyń zańdy quqyqtaryna nuqsan keltiretin ústem jaǵdaıdy teris paıdalaný is-qımylyn baıqady.

Osyǵan baılanysty, aktsıonerlik qoǵamǵa anyqtalǵan belgilerdi joıý jóninde sharalar qabyldaý qajettigi týraly habarlama jiberildi, onyń ishinde tutynýshylarǵa óz jabdyqtaryn paıdalanýǵa múmkindik berý týraly eskertpe de bar.

Aktsıonerlik qoǵam habarlamany oryndady. Al, abonentterdiń óz jabdyqtaryn paıdalaný múmkindigi týraly tıisti aqparat mekeme saıtynda ornalastyrylǵan.