«Qazaqtelekom» 63 myńnan astam abonentti «mystan» «optıkaǵa» aýystyrdy
Eldegi eń iri baılanys operatory birneshe jyl ishinde tutynýshylardyń 100% talshyqty-optıka tehnologııalaryna kóshirýdi kózdeıdi. Qazir «Qazaqtelekom» eskirgen mys jelilerin jańǵyrtý jobalaryn júzege asyrýda jáne bul jaǵynan Almaty qalasy kósh bastap tur. Onda joba bastalǵannan 14 myńnan astam abonent «optıkaǵa» ótti.
Eldegi mys jelileriniń uzaqtyǵy 53 myń shaqyrymnan asady, mys kabeli kóbine baılanystyń talshyqty-optıkaly jelilerimen «qatar» tartylǵan. Bul tutynýshylarǵa ADSL arqyly da, «optıka» arqyly da qyzmet alýǵa múmkindik beredi.
«Abonentterden túsetin shaǵymdardyń 70% mys tehnologııalary boıynsha tartylǵan baılanys sapasynyń nasharlaýyna qatysty, al «optıkaǵa» kóshý bul máseleni joıady. Jelini jańǵyrtý baǵdarlamasy – «Qazaqtelekomnyń» respýblıkanyń barlyq aımaqtarynda júzege asyryp otyrǵan basym jobalarynyń biri», - deıdi «Qazaqtelekom» AQ «Jeli Dıvızıony» birlestiginiń sapa jónindegi dırektory Shyńǵys Qusqambasov.
Almatyda dedýplıkatsııa jobasy iske asqaly 13 myńnan astam abonent qaıta qosyldy. Qala «optıkaǵa» ótý jaǵynan kósh bastap tur. Ekinshi orynda – 8 myńnan astam klıenti bar Pavlodar oblysy, «úshtikke» Soltústik Qazaqstan oblysy (6 myńnan astam abonent) kirdi.
Aýystyrý birneshe kezeńmen júzege asady – bul zertteý, taldaý jáne tıisti tehnıkalyq sheshimder izdeý. «Qazaqtelekom» úıdiń ornalasqan jerine, optıkalyq jelilerdiń jaqyndyǵy men qoljetimdiligine baılanysty daýystyq shlıýzder nemese ONT termınaldaryn ornatý, talshyqty-optıkaly baılanys jelilerin salý, tartý sııaqty balama nusqalardy da qarastyrýda.
«Aýystyrýdyń 80% tehnıkalyq múmkindikter, kabeldik káriz jaǵdaıyn tekserý, ekonomıkalyq tıimdiliktiń eseptelýine baılanysty. Sosyn kompanııa tutynýshylarǵa «optıkaǵa» kóshý arqyly aǵymdaǵy qyzmetterdiń aýqymyn keńeıtý qoljetimdiligi týraly habarlaıdy. «Fızıkalyq» aýystyrý turǵyndardyń naqty kelisimimen jáne PIK ne MIB ruqsatymen júzege asady. Turǵyndar tizimi qurylǵan soń jumys kúni men ýaqyty týraly kelisim jasalady», - deıdi «Qazaqtelekom» AQ «Jeli Dıvızıony» birlestiginiń Qoljetimdi jeli jónindegi dırektory Ǵazınur Raıymhanov.
Optıka múmkindigi keń: ol klıentterge 500 Mbıt/s jyldamdyqtaǵy ınternetti qostyrýǵa jáne zamanaýı telearna, telefonııa qyzmetterine jol ashady.
Qazirgi kórsetkish boıynsha 63 myńǵa jýyq abonent mys jelisin optıkaǵa aýystyrdy, jyl sońyna deıin taǵy 30 myńnan astam klıentti «optıkaǵa» kóshirý josparlanýda.
