«Qazaqtelekom» 24 orman sharýashylyǵyna beınebaqylaý júıesi men ınternet antennalaryn ornatady

ASTANA. KAZINFORM — Orman órtimen kúreske «Qazaqtelekom» da atsalysady. Bul týraly Tsıfrlyq damý, ınnovatsııalar jáne aeroǵarysh mınıstri Jaslan Mádıev Úkimet otyrysynda aıtty.

— «Qazaqtelekom» aktsıonerlik qoǵamy Ekologııa mınıstrligimen birlesip, orman órtterin erte anyqtaý júıesin ázirleý jumystaryn bastady. Júıe orman alqaptaryn keshendi monıtorıngileý sheshimin usynady. Bul baǵyt aıasynda arnaıy sholý beınekameralaryn ornatý josparlanǵan. Kameralardan túsetin beıne aǵyn baǵdarlama arqyly óńdelip, órt belgileri anyqtalǵan jaǵdaıda júıe derekter Tótenshe jaǵdaılar mınıstrliginiń komanda ortalyǵyna joldanady, — dedi ol.

Vedomstvo basshysy atalǵan joba aıasynda 40 myń sharshy shaqyrym aýmaqqa beınebaqylaý júıesi men arnaıy antennalar tartylatynyn málim etti.

— Osy júıeniń jumysyn qamtamasyz etý úshin «Qazaqtelekom» AQ antenna-machtalyq qurylystar men beınekameralardyń úzdiksiz jumysyn qoldaıtyn avtonomdy jáne rezervtik qýattandyrý júıelerin ornatýdy josparlap otyr. Nátıjesinde jalpy aýdany 40 myń sharshy kılometrden asatyn órt qaýpi eń joǵary 24 orman sharýashylyǵyn qamtý josparlanǵan, — dedi Jaslan Mádıev.

Sondaı-aq, búgin «Semeı ormany» rezervatynyń órt sharpyǵan aǵashyn satýdan qansha tabys túskeni aıtyldy.