«Qazaqtar táýelsizdik úshin kúrespedi» deý - ultty qorlaý - respýblıkalyq basylymdarǵa sholý
***
«Egemen Qazaqstan» gazetiniń jazýynsha, keshe Qazaqstan Respýblıkasynyń Qorǵanys mınıstri Ádilbek Jaqsybekovtiń tóraǵalyq etýimen Ujymdyq qaýipsizdik sharty uıymyna (UQShU) múshe memleketter Qorǵanys mınıstrleri keńesiniń (QMK) otyrysy ótti. Oǵan Armenııa, Belarýs, Qyrǵyzstan, Reseı, Tájikstan, Ózbekstan qorǵanys mınıstrlikteriniń delegatsııasy men UQShU-nyń Bas hatshysy Nıkolaı Bordıýja qatysty. Qorǵanys vedomstvolarynyń basshylary áskerı yntymaqtastyqty birlesip damytý men jetildirý jónindegi sharalardy jáne UQShU-ǵa múshe memleketterdiń odaqtyq yntymaqtastyǵyn kúsheıtý qajettigin talqylady. Sondaı-aq, UQShU jedel áreket etý ujymdyq kúshterin zamanaýı qarý-jaraqpen, áskerı jáne arnaıy tehnıkamen jabdyqtaý máseleleri, olardy damytý men jetildirý, áskerı-tehnıkalyq, áskerı ekonomıkalyq yntymaqtastyqty damytý, UQShU-ǵa múshe memleketter qarýly kúshteri úshin áskerı kadrlar júıesin jetildirý jaıy qaraldy. Maqala «Máseleler qaralyp, sheshimder qabyldandy» degen taqyryppen berildi.
«Nur Otan» HDP Aqmola oblystyq fılıaly janyndaǵy sybaılas jemqorlyqqa qarsy kúres jónindegi qoǵamdyq keńestiń kezekti májilisinde jer qatynastaryna qatysty másele qaraldy. Osy jaıt arqaý bolǵan maqala «Egemen Qazaqstan» gazetinde «Qoǵamdyq keńes qanaǵattanbady» degen taqyryppen berildi. Basylymnyń jazýynsha, jıynda baıandama jasaǵan oblystyq jer qatynastary basqarmasy bastyǵynyń mindetin atqarýshy Rústem Tókenovtiń aıtýynsha, 2011 jyly sot arqyly aýyl sharýashylyǵy jerlerin tıimdi paıdalanbaý saldarynan qazynaǵa 71 mıllıon teńge qarjy qaıtaryp alynǵan. Jeke turǵyn úı qurylysyna baılanysty Astanaǵa irgeles 20 eldi mekende kúrdeli jaǵdaı qalyptasqan. Munda 13 014 jer telimi bólingenimen, dál qazir 1 277 úıdiń ǵana qurylysy tolyq aıaqtalsa, 6 479 ýchaske ıesi úı turǵyzýǵa kirisken de joq. «Jınalys esep berýshiler kún tártibine qoıylǵan máseleniń mánin tereń túsinbegenin, sybaılas jemqorlyqtyń aldyn alý jóninde tushymdy maǵlumat berilmegendigin atap kórsetip, olardyń esebin qaıta tyńdaý týraly qaýly qabyldady», - dep jazady basylym.
***
Qazaqstan tarıhynyń daýly tustary, Jańaózen oqıǵasy, alǵashqy ǵaryshkerdiń saıası qadamy men «murager» taqyryby Qazaqstan Prezıdentiniń saıası máseleler jónindegi keńesshisi, saıasattaný ǵylymdarynyń doktory, professor Ermuhamet Ertisbaevtyń «Aıqyn» gazetine bergen suhbatynda talqylandy. Basylym tilshisiniń barlyq saýaldaryna tuşymdy jaýap bergen ol: «orystar Qazaqstanǵa órkenıetti ákeldi deý durys emes. Orystardyń ózderi, máselen, olarǵa orys memleketi qalyptasýynda eń aldymen vıkıngter, sonan keıin tatarlar basty ról atqardy deseń, ókpeleıdi. Kóshpeli jáne qalalyq órkenıet bar. Olar ózara yqpal etti. Biraq Batysty kenetten kótermeleý basqa elderdi de qalalyq mádenıettiń jolyna túsýge ıtermeledi. Qazaqtar ejelden Qytaı, Reseı, Buhara, Hıýamen de qyzý saýda-sattyq jasasty. Uly Jibek joly Qazaqstan arqyly ótti. Sondyqtan eger qazaqtar táýelsizdikti 1917 jyly alǵan bolsa, onda damýdyń ortaq vektory ózgermes edi, dálirek aıtqanda: ónerkásiptik jaǵynan damyǵan Reseımen tyǵyz yntymaqtastyq ornatqan bolar edi. Kez kelgen kishkentaı el ózine uly derjavadan odaqtas izdeıtini anyq», deıdi. Suhbat «Qazaqtar táýelsizdik úshin kúrespedi» deý - ultty qorlaý» degen taqyryppen berilgen.
***
«Aqtóbelik turǵyn «Táýelsizdik - el baqyty» atty uran sóz jazylǵan taqtaıshamen ájethanasynyń bir qabyrǵasyn jaýyp qoıǵan. Qalanyń kóne bóliginde, ıaǵnı A.Imanov kóshesindegi bul olqylyqty kórip, jaǵa ustap, bet shymshyǵan jaıymyz bar. Jar salyp jazbasaq, tura beretin, ári-beri ótken qazaqty myń óltiretin syńaıly»,- dep jazady «Aıqyn» gazeti búgingi sanyndaǵy «Urandap kiretin ájethana» degen taqyryptaǵy maqalasynda. Basylymnyń atap ótýinshe, Táýelsizdik kúni qarsańynda shaǵyn jáne orta bıznes ókilderi, dúkender men kólik jóndeý ortalyqtary «Táýelsizdik - el baqyty» atty urandy jıi iledi. Tipti, qatar turǵan eki kásip ıesi de osy sózdi tańdap, jazyp qoıatyn bolyp júr. Bul ákimshilikten kelgen tapsyrystyń, ótinishtiń oryndalý joly ǵana. Al myna Imanov kóshesi boıyndaǵy jeke úıdiń ájethanasynda ilinip turǵan sózdi qoǵamdyq kólikte kele jatyp, terezege telmirgen ár jolaýshy kóre alady.
***
«Alash aınasy» gazetiniń turaqty «Dat!» aıdarynda tehnıka ǵylymynyń doktory, professor Alllaıarbek Aıdosovpen aradaǵy suhbat «Sheteldik alpaýyt kompanııalarǵa halyqqa arnap áleýmettik jobalar uıymdastyrýdy mindetteý kerek» degen taqyryppen berilgen. Basylym tilshisiniń barlyq saýaldaryna tuşymdy jaýap bergen ol: «Memlekettiń irgeli, qýatty, ekonomıkasy damyǵan memleketke aınalýynyń eki joly bar. Biri jerasty qazba baılyqtary arqyly bolsa, ekinshi jol adamnyń basy arqyly. Qazir kóptegen elder, shyny kerek, adamdarynyń basy arqyly baıyp otyr. Oılap tabylǵan jańalyqtar sol zamat óndiriske engizilip, búkilálemdik qoldanysqa túsýi sol eldi úlkn paıdaǵa keneltýde. Al biz ázirge qazba baılyqtarymyzǵa ıek artyq», - deıdi.
***
«Keshe Memleket basshysy Nursultan Nazarbaev Ekonomıkalyq qylmysqa jáne sybaılas jemqorlyqqa qarsy kúres agenttiginiń (Qarjy polıtsııasy) tóraǵasy Rashıd Túsipbekovti qabyldady», dep jazady «Kazahstanskaıa pravda» gazeti. Basylymnyń atap ótýinshe, R.Túsipbekov Qazaqstan Prezıdentine qarjy polıtsııasy organdarynyń 2012 jylǵy birinshi toqsandaǵy jumysynyń nátıjelerin baıandady. Mysaly, ótken jyldyń osy kezeńimen salystyrǵanda, sybaılas jemqorlyqtyń anyqtalýy 23 paıyzǵa, ekonomıkalyq qylmystardyń anyqtalýy 6,5 paıyzǵa artqan. Vedomstvo basshysy, sondaı-aq Memleket basshysyn qarjy polıtsııasy qyzmetkerleriniń kásipkerlik qyzmetine aralaspaýy jáne bızneske ákimshilik qysymdy tómendetý jóninde qabyldanǵan sharalar týraly habardar etti.
