Qazaqtar spırttik ishimdikti orystardan kóp ishedi
ASTANA. 18 naýryz. QazAqparat - Orta Azııa elderi arasynda spırttik ishimdikti eń kóp tutynatyndar qazaqstandyqtar bolyp shyqty. Jan basyna shaqqanda elimizdiń árbir turǵynyna jyl saıyn 11 lıtr taza etıl spırti tıedi eken. Bul týraly Búkilálemdik densaýlyq saqtaý uıymy taratqan málimetterge silteme jasaı otyryp, BAQ.KZ portaly habarlaıdy.
1,5 mıllıard halqy bar kórshi Qytaıdyń ózi bizdiń kóshke ilese almaǵan kórinedi.
Eýropaǵa keler bolsaq, munda alǵashqy úshtikti Estonııa qorytyndylap tur. Al, birinshi jáne ekinshi oryndarda Moldova men Lıýksembýrg. Jasy 15-ten asqan estondyqtardyń jan basyna shaqqandaǵy kórsetkishi - jylyna 15 lıtr taza etıl spırti. Araqty ulttyq sýsynymyz dep sanaıtyn reseılikter bolsa bul tizimniń tek ortasynda ǵana. Mundaǵy árbir turǵyn jylyna orta eseppen 10 lıtrdeı spırt tutynady eken.
Al, alkogoldi eń az paıdalanatyn halyq Tájikstan men Túrkııada. Sondaı-aq, bul tizimniń eń sońǵy qatarynda Norvegııa, Shvetsııa, Islandııa syndy memleketter bar. Densaýlyq saqtaý uıymynyń músheleri bolsa, jan basyna shaqqandaǵy kórsetkish jylyna 8 lıtr etıl spırtinen aspaýy tıis deıdi. Alkogoldi bul kórsetkishten asyra paıdalansa, halyqtyń ulttyq qasıetteri, bolmysy men tegi joǵalady, deıdi ǵalymdar.
