Qazaqtandyqtar tutynýshy quqyǵyn qorǵaý boıynsha ótinish jazýdy jıiletken
ASTANA. KAZINFORM — Elimizde azamattardyń tutynýshy quqyǵyn qorǵaýyn talap etken ótinishterdiń sany úsh ese artqan. Kóbine qazaqstandyqtar bólshek jáne elektrondy saýda, sondaı-aq turmystyq qyzmetter boıynsha shaǵym túsiredi.
Saýda jáne ıntegratsııa mınıstrligi tutynýshylardyń quqyǵyn qorǵaý komıtetiniń tóraǵasy Bolat Tańabergenovtiń ortalyq kommýnıkatsııalar qyzmeti alańynda ótken baspasóz máslıhatynda keltirgen málimetterine súıensek, 2020 jyly ýákiletti organǵa 21 myń ótinish túsken, 2024 jyly olardyń sany 62,5 myńǵa deıin kóbeıgen.
Bıyl 10 aıdyń ishinde shamamen 68 myń shaǵym tirkelgen.
Tutynýshylar eń kóp shaǵymdanatyn úsh baǵyt:
— Bólshek saýda — 28 myń ótinish (41%). Tutynýshylar taýardy aıyrbastaýdan nemese qaıtarýdan bas tartqany úshin, sondaı-aq aqaýy bar nemese sapasyz taýardyń aqshany qaıtarmaǵany úshin shaǵymdanady;
— Internet-saýda — 15,3 myń (23%). Negizgi sebepter — taýar nemese satýshy týraly aqparattyń jetkiliksizdigi, taýardyń sıpattamaǵa sáıkes kelmeýi, dúkenderdiń aqshany qaıtarýdan bas tartýy jáne alaıaqtyq jaǵdaılar;
— Turmystyq qyzmetter — 5,2 myń (8%).
Tutynýshylardyń quqyǵyn qorǵaý komıtetiniń aqparaty boıynsha, keıbir sala boıynsha shaǵym úlesi az bolǵanymen, jekelegen baǵyttarda kelip túsetin ótinish óte joǵary. Mysaly, bilim berý salasyna qatysty shaǵymdar sany 234%-ǵa ósken, qoǵamdyq tamaqtaný boıynsha tutynýshynyń quqyǵyn qorǵaý týraly ótinish kólemi 196%-ǵa artyp otyr.
— Jekelegen salalardaǵy shaǵym sanynyń artýy tutynýshylardyń quqyǵyn tıimdi qorǵaý tetikterin ázirleý úshin memleket, bıznes jáne qoǵamnyń birlesken kúsh-jigerin talap etedi. Qazir tutynýshylar taýarlar men qyzmetterdiń sapasyna barynsha talapshyl, bul zańnamany jetildirýmen qatar, bıznestiń klıentterdiń qajettiligin qanaǵattandyrýǵa degen kózqarasyn ózgertýin qajet etedi, — deıdi Bolat Tańabergenov brıfıng barysynda.
Onyń aıtýynsha, túsken shaǵymdardyń 37%-y tolyq qanaǵattandyrylǵan, ıaǵnı árbir úshinshi tutynýshy ótemaqy alǵan. Taǵy 34%-y túsindirý jáne keńes alǵan, al 23% ótinish basqa memlekettik organdarǵa ári qaraı qarastyrý úshin joldanǵan.
Buǵan deıin mınıstrlik ókili «Jeńildikpen alǵan taýardy qaıta ótkizýge bola ma?» degen saýalǵa jaýap berdi.
Aıta keteıik, elimizde saýda oryndarynda eki túrli baǵa qoıý júıesi engizilip jatyr: satyp alý jáne bólip tóleý. Onyń aıyrmashylyǵyn quzyrly organ ókili túsindirip berdi.