«Qazaqtan shyqqan Messı» talantty fýtbolshylardyń álemdik reıtıngine kirdi
TARAZ. QazAqparat - Taraz týmasy Erkebulan Seıdahmetti aǵylshyn tilindegi Sideline Scouted portaly talantty fýtbolshylardyń álemdik reıtıngine kirgizdi, dep habarlaıdy QazAqparat tilshisi.
Bul jaıly aqparat reseılik «Ýfa» klýbynyń saıtynda jarııalandy. Osy klýbtyń sapyna qysta qosylǵan Erkebulanǵa 114 fýtbolshynyń arasynda 56-oryn buıyrdy.
Klýbtyń saıtynda Erkebulan Seıdahmettiń suhbaty da jarııalanǵan.
«Qazaqtan shyqqan Messı» degen atqa qalaı qaraısyń degen suraqqa jas fýtbolshy: «Barlyǵyn jýrnalıster oılap tapqan. Men buǵan basa mán bermeýge tyrysamyn. Messı, Ronaldý, Pele, Maradonna sııaqty fýbolshylardyń deńgeıine jetýdi jurttyń bári armandaıdy. Al men Erkebulan bolyp qalýǵa áreket etemin. Men kásipqoı fýtbolǵa endi ǵana keldim. Úlken jetistikterge jetý úshin kóp jumys isteýim qajet», - deıdi fýtbolshy.
Jambyl mektebi Seıildá Baıshaqov, Vahıd Masýdov, Vaıt Talǵaev, Anton Shoh, Evgenıı ıArovenko syndy tanymal fýtbolshylardy bergen. Solardyń biri Baýyrjan Islamhandy Erkebulan kýmırim dep biledi.
Aıta keteıik, E. Seıdahmet 2017 jyly álem fýtbolynda jarqyrap shyqty. Qazaqstannyń jasóspirimder quramasy sapynda 2017 jylǵy Granatkın Memorıalynyń «Úzdik shabýylshysy» atandy.
17 jastaǵy Erkebulan reseılik «Zenıt» klýbynyń jastar komandasyna qosylyp, Italııadaǵy bedeldi «Viareggio Cup» týrnırinde «Atletık ıÝnıon» qaqpasyna bir taımda tórt gol soǵyp, kózge tústi. Jasy jetpegendikten, «Zenıttiń» negizgi komandasyna aýysa almaǵan Erkebulan «Taraz» FK sapynda Qazaqstan Premer-lıgasynda ótkizgen 15 oıynda bir gol soǵyp, bir nátıjeli pas berdi.
Ulttyq quramaǵa bas bapker bolyp kelgen Stanımır Stoılov jastarǵa senim bildirdi. Býdapeshte Vengrııaǵa qarsy ótken joldastyq kezdesýde Erkebulan jarqyn oıyny jáne golymen taǵy da kózge tústi.
Aqpanda 18-ge tolǵan Seıdahmet «Ýfamen» uzaq merzimdi kelisimshartqa qol qoıyp, «Anjıge» qarsy debıýt oıynynda (3:2) komandasy soqqan goldardyń barlyǵyna óz úlesin qosty.
