Qazaqtan men Ózbekstan sý resýrstaryn bólýge qatysty qujatqa qol qoıdy

NUR-SULTAN. QazAqparat - Qazaqstan Ekologııa, geologııa jáne tabıǵı resýrstar mınıstri Maǵzum Myrzaǵalıev Ózbekstanmen sý qatynastary salasyndaǵy mańyzdy qujattyń bekitilgenin málim etti, dep habarlaıdy QazAqparat tilshisi.

«Tashkentke jumys sapary barysynda búgin Ózbekstan sý sharýashylyǵy mınıstri Sh.Hamraevpen eki el arasyndaǵy sý salasyndaǵy yntymaqtastyq máseleleri jónindegi Jol kartasyna qol qoıdyq», - dep jazdy M.Myrzaǵalıev Twitter-degi paraqshasynda.

Onyń aıtýynsha, qol qoıýǵa «bizdiń vedomstvolarymyzdyń uzaq jáne úzdiksiz kelissózderi sebepshi bolǵan».

«Qujat óte mańyzdy. Ol sý salasyndaǵy birqatar máselelerdi retteıdi. Atap aıtqanda, 1991 jyldan beri salynǵan jáne qaıta jóndelgen sý nysandaryn birlesken tehnıkalyq zertteý men monıtorıngileýdi; joǵary sý qoımalarynan qosymsha sý tastalýyn qamtamasyz etýdiń birlesken sharalaryn qabyldaýdy kózdeıdi», - dedi mınıstr.

«Jol kartasyndaǵy taǵy bir mańyzdy tus - sý resýrstaryn bólýdegi aıqyndyq», -deıdi ol. Myrzaǵalıev ózbek tarapymen kelissózder jalǵasýda ekenin, «kún tártibinde taǵy birneshe strategııalyq másele bar» ekenin habarlady.