Qazaqta keremet meıirimdi jandar baryn sonda kórdim - Arystaǵy jarylysta jas anany bosandyrǵan akýsher
«Dúısenbi kúni kezekshilikke túsken kezim. Kenje degen kelinshek saǵat segizge taıaý bosaný bólimine tolǵaqpen tústi. Mańaı typ-tynysh, kúndelikti ómirimizdiń bir kúni edi. Bul áıeldiń ekinshi ret bosanýy eken. Bólimshe jetekshisi Naǵıma Tálipova ekeýmiz ol áıeldi tolyq tekserip, azdap tolǵatatynyn, 2-3 saǵattan keıin bosanatynyn aıttyq. Bir ýaqytta áriptesterim áskerı bólim jaqtan ot shyǵyp jatqan sekildi deı bastady. Kóp mán bere qoımadyq. Órt shyqsa sóner dep oıladym. Aıaq astynan saǵat 09.20 ketken kezde jarylys «gúrs» ete qalyp, tolǵatyp jatqan áıeldiń palatasynyń esigi ushyp tústi. Áınek syndy. Jer silkingendeı ǵımaratymyz eki-úsh ret yrǵala qozǵalyp, abdyrap qaldyq», - deıdi Naǵıma Zorymbaeva.
Akýsherdiń aıtýynsha, bir sátke bári typ-tynysh bola qalǵanymen, kóp ótpeı jarylys birinen-biri qaıtalanyp, aspandy kók tútin alyp ketken.
«Dalaǵa shyǵamyz dep, bárimiz shýlasyp qaldyq. Árkim óziniń bólimshesine júgirdi. Men birden myna áıelge ǵana jaýapty bolaıyn dedim de, búkil qajetti nárseni alyp, bir sanıtar qyzdy ertip dalaǵa qasha jóneldik. Aıqaı-shý. Qanshama áıel bosanyp jatqandyqtan, Naǵıma Tálipova aýrýhanada qalyp qoıdy. Sanıtar ekeýmiz áıeldi ustaǵan kúıi ashyq alańǵa qashtyq. Kerek-jaraǵymyzdy ala ketken bolatynbyz», - deıdi ol.
Jarylystan qashqan halyqtyń bári qyrdyń basyna shyqpaqqa bıikke umtylypty.
«Snarıadtardyń daýysyn estidińiz be, joq pa bilmeımin - ysqyryp kep jibergende basyńa tónip kele jatqandaı úlken úreı týdyrady eken. Ysqyryp qalǵanda jata qalamyz. Qoryqqanymyz sonshalyqty, qansha shaqyrymǵa qashqanymyz esimde joq. Bes shaqyrymdaı basyp óttik qoı deımin. Sanıtar qyz ekeýmiz jetektep kele jatyrmyz. Anda-sanda sý ishkizemiz. Tolǵaǵy qysyp barady. Kólikterdiń birin toqtatý kerek boldy. Bir áskerı jigit toqtap, úsheýimiz kóligine minip aldyq. Álgi jigit «Jumys jaǵyma ketem. Ózim ottan shyǵyp turmyn» dedi. Aptechkalaryn alyp qaldyq. Qarasam, álgi áskerı jigittiń beti kúıip qapty. Birshama jetkizip tastaǵannan keıin ol buryldy da otqa oranǵan qalaǵa qaıta tartty. Jolda taǵy «Nıva» kóligin toqtattyq. Sanıtar qyz syımaı qalyp ketip, bir shetke ákep tastady. Álgi «Nıvanyń» benzıni taýsyldy», - deıdi akýsher.
Osylaı, eki saǵat boıy azap kórgen Kenje men Naǵıma aqyry BǴM ókilderi mingen kólikke kezigedi. Kóliktiń ishinde bir áje, birneshe bala men mınıstrliktiń úsh ókili bolǵan. Birshama jol júrgennen keıin kólik ishindegi áje «men ary barmaımyn, ólsem osynda ólem, myna aıaǵy aýyr áıeldi qutqaryńdar» dep qalyp qoıypty. Montaıtas qaıda dep izdep kele jatqan kólik aqyry Qazyǵurt aýdanynyń Aqjar aýylyna tirelgen.
«Áıeldiń tolǵaǵy kúsheıe bastady. Júrgizýshi Dosmuhambet bir úıge toqtap, álgi úıdiń otanasy Gúlmıra degen apaı bir bólme bólip berdi. Óte jaqsy kisiler eken. Búkil jaǵdaıdy jasady. 12.58 mınýt ketkende qyz bala dúnıege keldi. Qanshama ýaqyt kúshendi. Mine, osyndaı qıyndyqty basyp ótip, jas ana bosandy. Odan keıin úı ıesi jedel járdem kóligine qońyraý shalyp, Kenjeni alyp ketti. Ana úıdiń apaıy Gúlmıra kishkentaı sábıge búkil kıim-keshegin daıyndap, paketke salyp berdi. Tamaǵyn, shaıyn daıyndap berdi. Qazaqtyń sondaı keremet jaqsy kisileri baryn sonda kórdim», - deıdi Naǵıma.
Naǵıma Zorymbaeva óz áreketin erlikke balamaıtynyn aıtady. «Ózimniń mindetim» deıdi. Qanshama qıyndyqqa qaramastan, halyq bir-birine qolyna qol ushyn sozyp, basqa túsken qaıǵyny birge kóterip keledi.
Eske sala ketsek, Bilim jáne ǵylym mınıstri Ashat Aımaǵambetov Arystaǵy jarylys kezinde jas anany bosandyrýǵa kómektesken muǵalimderdi marapattady. Shaıza Doskeeva, Balbópe Ótenova, Janat Nurjumanova - mınıstrliktiń atynan dál osy úsh muǵalim Arysta jarylys bolǵan kezde mektepte UBT-nyń apellıatsııa otyrysyn ótkizip jatqan bolatyn.
