Qazaqta ınternet-jýrnalıstıka qalyptasa qoıǵan joq

Búgin «Qazaq ınterneti» qoǵamdyq birlestiginiń uıymdastyrýymen Almaty qalasynyń suhbat alańynda ótken «Qazaq ınternet-jýrnalıstıkasynyń damýy» degen taqyryptaǵy dóńgelek ústel jıynynda osylaı aıtyldy. «Qazaq ınternet-jýrnalıstıkasynyń damýy týraly aıtý qıyn. Óıtkeni oǵan eń aldymen ǵylymı turǵydan anyqtama berý kerek. Qazaqstandaǵy jaǵdaıdy Reseımen ne ózge de batys elderimen salystyrýǵa bolmaıdy. Bizde dástúrli jýrnalıstıkanyń ózi múlde basqasha. Onyń qazaq tildi, orys tildi dep bólinýi sııaqty óz erekshelikteri bar. Internet-jýrnalıstıka bolý úshin birinshi ınternet-jýrnalıster bolý kerek. Bizde áli olardy daıyndaıtyn kásibı orta joq», - deıdi «Media communications» salasyn zerttep júrgen bloger-jýrnalıst Ashat Erkimbaı. Onyń aıtýynsha, Qazaqstanda keıbir joǵary oqý oryndarynda birdi-ekili pánder bolǵanymen, ony oqytatyn mamandardyń daıarlyǵy men oqytý ádistemesi áli qalyptaspaǵan. Ony zertteıtin uıym da joq. Sondyqtan eń aldymen onyń negizin qalyptastyrý qajet. Sonyń neginde mamandar daıarlaǵannan keıin ǵana ınternette sapaly kontent qalyptasatyn bolady. Qazir ınternet-jýrnalıstıkany ár adam ártúrli túsinedi. Aqparattyq tehnologııa salasyndaǵy mamandardyń qyzmeti týraly áralýan túsinik bar. Qazaq ınternet-jýrnalıstıkasynda qazirgi tańda Qazaqstan telearnasy men Azattyq radıosyn úlgi tutýǵa bolady.