Qazaqstanyń «jasyl» bastamalaryna Dúnıejúzilik banktiń 1 mlrd. dollary tartylady - QR Qorshaǵan ortany qorǵaý mınıstrligi
ASTANA. 30 qarasha. QazAqparat - Qazaqstannyń jasyl ekonomıkaǵa kóshý strategııasyn daıarlaý aıasynda ınvestıtsııalardy tartý jumysy ońtaıly sheshilip jatyr. Bul týraly búgin Astanada ótip jatqan «Qazaqstannyń jasyl ekonomıkaǵa kóshý strategııasynyń ádistemelik joldary» taqyrybyndaǵy semınarda QR Qorshaǵan ortany qorǵaý mınıstrliginiń jaýapty hatshysy Anatolıı Dernovoı málim etti.
Onyń aıtýynsha, búginde Qorshaǵan ortany qorǵaý mınıstrligi Qazaqstannyń jasyl ekonomıkaǵa kóshý strategııasyn daıarlap jatyr. 2030 jylǵa deıingi strategııada búgingi jahandyq máseleler kórinis taýyp, taza ekonomıkaǵa kóshý tetikteri belgilenedi. Atalǵan qujat 2050 jylǵa deıingi boljamdy qamtıtyn bolady. «Biz jasyl ekonomıkaǵa ınvestıtsııalardy tartý máselesin de ońtaıly sheship kelemiz. Búginde Dúnıejúzilik banktiń taza tehnologııalar qorymen kelisip, 1 mlrd. dollar kólemindegi qarajatty tartýdy kózdep otyrmyz. Ol aqsha jylý qubyrlaryn jańǵyrtý jáne balamaly energııa kózderin damytýǵa jumsalmaq», - deıdi A.Dernovoı. Jaýapty hatshynyń aıtýynsha, qazirdiń ózinde Pavlodar men Petropavl qalalarynda jylý qubyrlaryn jańǵyrtý boıynsha alǵashqy jobalar qolǵa alyndy. Al Aqtaýda qaldyqtardy joıýǵa arnalǵan jumystar atqarylyp jatyr. «Aldaǵy ýaqytta ondaı bastamalardy Astana, Almaty, Shymkent, Qaraǵandy jáne basqa da oblys ortalyqtarynda iske asyrý josparlanyp otyr», - dep atap kórsetti A.Dernovoı.
