Qazaqstan–Sıngapýr: tikeleı áýe qatynasyn ashý múmkindigi qaraldy
ASTANA. KAZINFORM — Marrakesh qalasynda (Marokko) ICAO Global Implementation Support Symposium 2026 forýmy alańynda QR Kólik mınıstrligi Azamattyq avıatsııa komıtetiniń tóraǵasy Saltanat Tompıeva Sıngapýr Respýblıkasynyń Kólik, mádenıet, qoǵamdyq ister jáne jastar Mınıstri Beı ıAm Keng myrzamen kezdesti. Bul týraly Azamattyq avıatsııa komıteti málim etti.
Kezdesýge sondaı-aq IKAO Keńesindegi Sıngapýrdyń Turaqty ókili Eılın Po hanym, IKAO janyndaǵy Qazaqstan Respýblıkasynyń Turaqty ókili Tımýr Tlegenov myrza, Sıngapýr avıatsııa akademııasynyń dekany jáne Sıngapýrdyń Azamattyq avıatsııa basqarmasynyń (CAAS) aǵa keńesshisi Teı Tıang Gýan myrza qatysty.
Taraptar azamattyq avıatsııa salasyndaǵy ekijaqty yntymaqtastyqty damytý máselelerin talqylady, onyń ishinde avıatsııalyq qaýipsizdikti qamtamasyz etý, avıatsııalyq ınfraqurylymdy damytý, sondaı-aq salaǵa zamanaýı tsıfrlyq sheshimderdi engizý máseleleri qaraldy. Sonymen qatar halyqaralyq uıymdar aıasyndaǵy ózara is-qımyl, onyń ishinde IKAO sheńberindegi yntymaqtastyqqa nazar aýdaryldy.
— Eki el arasyndaǵy jolaýshylar tasymalyna suranystyń artýyna baılanysty taraptar áýe qatynasyn ashý máselesin, onyń ishinde «aýa erkindiginiń» besinshi dárejesin paıdalaný múmkindigin talqylady. Sıngapýr tarapy Qazaqstannyń tanymal baǵytqa aınalyp kele jatqanyn atap ótip, osyǵan baılanysty tikeleı áýe qatynasyn damytýǵa jáne elder arasyndaǵy kólik qoljetimdiligin keńeıtýge qyzyǵýshylyq bildirdi, — delingen habarlamada.
Saltanat Tompıeva Sıngapýrdyń álemdegi jetekshi avıatsııalyq ortalyqtardyń biri ekenin atap ótip, avıatsııalyq kadrlardy daıarlaý salasyndaǵy seriktestikti nyǵaıtý men yntymaqtastyqty keńeıtýdiń mańyzdylyǵyn erekshe atap ótti.
Qazaqstan men Sıngapýr avıatsııa akademııasy arasyndaǵy yntymaqtastyq qazirdiń ózinde naqty nátıjeler berýde: qazaqstandyq avıatsııalyq personal atalǵan akademııada oqýdan ótip, biliktiligin arttyrýda.
Aldaǵy ýaqytta taraptar ózara is-qımyldy keńeıtip, daıarlaý baǵdarlamalarynyń aýqymyn ulǵaıtý jáne avıatsııa salasyndaǵy kadrlardyń kásibı damýy boıynsha áriptestikti tereńdetýdi josparlap otyr.Kezdesý qorytyndysy boıynsha avıatsııa salasynyń turaqtylyǵy men tıimdiligin arttyrýǵa baǵyttalǵan birlesken bastamalardy iske asyrý jáne yntymaqtastyqty odan ári damytýǵa ózara qyzyǵýshylyq rastaldy.
Al búgin Astana — Ulan-Batyr baǵytynda áýe reısi ashylatyny habarlandy.
