Qazaqstan–Ózbekstan shekaralyq kelisimi bekitildi
ASTANA. KAZINFORM — Májilis Qazaqstan men Ózbekstan úkimetteri arasyndaǵy Qazaqstan–Ózbekstan memlekettik shekarasynyń rejımi týraly kelisimdi ratıfıkatsııalady.
Zań jobasyn Májiliste Ulttyq qaýipsizdik komıteti tóraǵasynyń orynbasary — Shekara qyzmetiniń dırektory Erlan Aldajumanov tanystyrdy.
Onyń aıtýynsha, kelisimge 2024 jylǵy 8 tamyzda Astanada eki eldiń syrtqy ister mınıstrleri qol qoıǵan.
— Kelisimniń basty maqsaty — Qazaqstan men Ózbekstan arasyndaǵy memlekettik shekaradaǵy tártipti quqyqtyq negizde aıqyndaý, — dedi Erlan Aldajumanov.
Qujatta memlekettik shekarany kúzetý, adamdardy, kólik quraldaryn, júkter men ózge de múlikti shekara arqyly ótkizý tártibi belgilengen.
Sondaı-aq memlekettik shekara ústinen ushýlardy júzege asyrý, shekara mańyndaǵy aýmaqtar men shekaralyq sýlarda sharýashylyq jáne ózge de qyzmet júrgizý máseleleri qamtylǵan.
— Qujatta shekaradaǵy tosyn jaǵdaılardy retteý tetikteri de kózdelgen, — dedi ol.
Erlan Aldajumanovtyń sózinshe, kelisimdi ratıfıkatsııalaý Qazaqstan–Ózbekstan shekarasyndaǵy tártipti naqtylap, ulttyq qaýipsizdikti nyǵaıtyp, eki el arasyndaǵy yntymaqtastyqty arttyrýǵa múmkindik beredi.
Ol qujattyń teris áleýmettik-ekonomıkalyq nemese quqyqtyq saldary joq ekenin aıtty. Sondaı-aq kelisimdi iske asyrý respýblıkalyq jáne jergilikti bıýdjetten qosymsha qarjy talap etpeıdi.
Ózbekstan bul kelisimdi 2025 jylǵy 26 qańtarda ratıfıkatsııalaǵan edi.
Aıta keteıik, buǵan deıin 2026 jyldyń alǵashqy tórt aıynda Qazaqstan men Ózbekstan arasyndaǵy taýar aınalymy artqany habarlanǵan edi.
