Qazaqstan–Ózbekstan: halyqaralyq avtotasymalǵa 20 myń qosymsha ruqsat bólinedi
ASTANA. KAZINFORM — Samarqand qalasynda Qazaqstan–Ózbekstan halyqaralyq avtomobıl qatynasy jónindegi aralas komıssııasynyń kezekti otyrysy ótti. Bul týraly Kólik mınıstrligi málim etti.
Otyrys qorytyndysy boıynsha eki el arasyndaǵy halyqaralyq avtokólik tasymaldaryn odan ári jeńildetý jáne tranzıttik qatynasty damytý jóninde birqatar kelisimge qol jetkizildi.
Tasymaldaýshylardyń qajettiligin qamtamasyz etý jáne júk tasymalynyń turaqty júrýine jaǵdaı jasaý maqsatynda Qazaqstan men Ózbekstan 2026 jylǵa qosymsha 20 myń ruqsat blankisimen almasýǵa kelisti.
Sonymen qatar, taraptar 2026 jyldyń sońyna deıin elektrondyq ruqsat blankilerimen shekteýsiz almasýǵa kóshý máselesin pysyqtaýǵa ýaǵdalasty. Bul halyqaralyq avtokólik tasymaldaryn jyl saıyn belgilenetin ruqsat kvotasyna baılanysty shekteýlersiz júzege asyrýǵa múmkindik beredi.
— Tranzıttik tasymaldardy damytý máselesine de erekshe nazar aýdaryldy. Taraptar Qazaqstan men Ózbekstan arasyndaǵy kedergisiz tranzıtti qamtamasyz etý máselesin pysyqtaýǵa kelisti. Bul ákimshilik rásimderdi qysqartyp, tranzıttik baǵyttardyń tıimdiligin arttyrýǵa múmkindik beredi, — delingen habarlamada.
Otyrysta avtomobıl joldarynyń ınfraqurylymyn damytý jáne onyń saqtalýyn qamtamasyz etý máseleleri qaraldy. Osy baǵytta taraptar tájirıbe jáne úzdik praktıkalarmen almasýǵa kelisti.
Sondaı-aq kólik-logıstıkalyq ınfraqurylymdy damytý jumystaryn úılestirý jáne Eýrazııa keńistiginde biryńǵaı kólik-logıstıkalyq qańqany qalyptastyrý máseleleri talqylandy.
Otyrys barysynda ekijaqty jáne tranzıttik júk tasymaldaryn damytýǵa qatysty ózekti máseleler qaraldy. Júk tasymaly kóleminiń turaqty ósimi jáne halyqaralyq kólik dálizderiniń jumysyn qamtamasyz etýdegi Qazaqstan men Ózbekstannyń mańyzdy róli atap ótildi.
Otyrys qorytyndysy boıynsha taraptar yntymaqtastyqty odan ári damytýǵa, halyqaralyq avtokólik tasymaldaryna kedergi keltiretin máselelerdi kezeń-kezeńimen joıýǵa jáne eki el arasyndaǵy ózara saýda men tranzıttik áleýetti arttyrýǵa qolaıly jaǵdaı jasaýǵa múddeli ekenin rastady.
Aıta keteıiák, buǵan deıin orta dáliz arqyly júk tasymaly 22%-ǵa artqanyn jazdyq.
