Qazaqstan–Ortalyq Azııa temirjol tasymaly І toqsanda 34%-ǵa ósti
ASTANA. KAZINFORM — Bıylǵy jyldyń І toqsanynda Qazaqstan men Ortalyq Azııa elderi arasyndaǵy temirjol tasymaly 34%-ǵa ósti. Eksporttyq jáne tranzıttik aǵyndardyń aıtarlyqtaı ósýi, ásirese astyq, qara metall jáne munaı ónimderinde, Qazaqstannyń óńirlik saýda-ekonomıkalyq baılanystardaǵy kóshbasshylyq pozıtsııasyn nyǵaıtyp otyr. Bul týraly «Qazaqstan temir joly» UK málim etti.
Ósim tasymaldaý protsesiniń tıimdiligin arttyrý, jetkizý merzimderin qysqartý jáne temirjol ınfraqurylymyn damytý esebinen qamtamasyz etildi.
Eksporttyq tasymaldar, eń aldymen agroónerkásiptik sektorda aıtarlyqtaı serpin kórsetip otyr. Astyq eksporty 2 080 myń tonnaǵa jetti (ótken jyldyń sáıkes kezeńimen salystyrǵanda +50%).
Ónerkásiptik segmentte qara metaldar eksporty 43% (442 myń tonnaǵa deıin) ósti, munaı ónimderi — 6% (212 myń tonna).
— Qazaqstan aýmaǵy arqyly Ortalyq Azııa elderi baǵytynda tranzıttik tasymaldardyń oń serpini saqtalýda. Munaı ónimderi tranzıtiniń kólemi 28%-ǵa, qara metaldar 42%-ǵa ulǵaıdy. Azyq-túlik júkterin tasymaldaý 28%-ǵa ulǵaıdy, — delingen habarlamada.
Keri baǵytta tranzıttik aǵyndardyń ósýi de tirkelýde. Atap aıtqanda, sodamen qosa hımııalyq ónimderdi tasymaldaý kólemi 2 esege (36 myń tonnaǵa deıin), jemis-kókónis ónimderin tasymaldaý kólemi 50% (28 myń tonna), tústi kendi tasymaldaý kólemi 10% (56 myń tonna) ulǵaıdy.
Óńir elderi bólinisinde Ózbekstanmen tasymaldaý kólemi 37%, Túrikmenstanmen 31%, Tájikstanmen 16%, Qyrǵyzstanmen 13% ósip otyr.
Osylaısha, Qazaqstan pozıtsııasyn dáıekti túrde nyǵaıtyp, óńirdegi saýda-ekonomıkalyq baılanystardyń ornyqtylyǵyna úles qosyp otyr.
Aıta keteıik, eksporttyq júk tasymalynyń kólemi temirjolda 2,2 paıyzǵa artty.
