Qazaqstan–Ońtústik Koreıa: Toqaevtyń Seýldegi sapary sheteldik baspasóz nazarynda
ASTANA. KAZINFORM — Prezıdent Qasym-Jomart Toqaevtyń Ońtústik Koreıaǵa memlekettik saparynyń qorytyndylary sheteldik buqaralyq aqparat quraldarynyń nazarynda. Seýldegi kelissózder barysynda quny 19 mlrd dollar bolatyn kommertsııalyq kelisimder jasaldy. Sheteldik basylymdar energetıka, strategııalyq mańyzdy mıneraldar, tehnologııa jáne eki el arasyndaǵy yntymaqtastyqty odan ári keńeıtý bolashaǵyna basymdyq berdi. Kazinform sheteldik BAQ-ta jarııalanǵan materıaldarǵa sholý jasaıdy.
Reuters: Ońtústik Koreıa men Qazaqstan atom energetıkasy boıynsha memorandýmǵa qol qoıyp, strategııalyq mańyzdy mıneraldar saýdasyn talqylady
Reuters agenttiginiń habarlaýynsha, Ońtústik Koreıa men Qazaqstan prezıdenti Lı Chje Men men Qasym-Jomart Toqaevtyń kezdesýinde atom energııasyn beıbit maqsatta paıdalaný salasyndaǵy yntymaqtastyq týraly kelisimge qol qoıdy.
Atom energetıkasy jónindegi memorandým energetıka, munaı, ǵylym jáne tehnologııalardy qosa alǵanda, túrli salalardy qamtıtyn 13 qujattyń qatarynda boldy.
— Qazaqstannyń bolashaqtyń joǵary tehnologııalyq salalarynda áleýeti zor jáne ol Ońtústik Koreıanyń negizgi seriktesi, — dedi Lı Chje Men.
Eki el saýda, energetıka, jasandy ıntellekt jáne strategııalyq mańyzdy mıneraldar salalaryndaǵy yntymaqtastyqty tereńdetýge kelisti. Bul Seýldiń shıkizat jetkizý tizbegin ártaraptandyrýǵa umtylysymen tuspa-tus kelip otyr. Ońtústik Koreıa munaı men ýran saýdasymen shektelmeı, ekijaqty baılanysty keńeıtýdi, atap aıtqanda, lıtıı jáne basqa da strategııalyq mańyzdy mıneraldar baǵytyndaǵy yntymaqtastyqty damytýǵa múddeli.
AJP: Koreıa men Qazaqstan munaı jáne ıadrolyq otyn jetkizý boıynsha kelisimder jasady
AJP málimetinshe, Seýldegi sammıt barysynda Ońtústik Koreıa men Qazaqstan qarym-qatynastaryn jan-jaqty strategııalyq seriktestik deńgeıine kóterý aıasynda shıki munaı men ıadrolyq otyn jetkizý salalaryndaǵy yntymaqtastyqty tereńdetýge ýaǵdalasty.
Taraptar Qazaqstan munaıyn jetkizý, munaı-gaz ken oryndaryn ıgerý, ıadrolyq otyn jetkizý tizbegin qalyptastyrý, sondaı-aq atom elektr stantsııalary men shaǵyn modýldik reaktorlar boıynsha zertteýler júrgizý baǵyttarynda birlesip jumys isteıdi.
— Búginde Koreıa Qazaqstannyń eń iri saýda jáne ınvestıtsııalyq seriktesteriniń biri, — dedi Prezıdent Qasym-Jomart Toqaev.
Ótken jyly eki el arasyndaǵy saýda kólemi 3 mlrd dollardan asty, al Ońtústik Koreıanyń Qazaqstanǵa salǵan ınvestıtsııasy 12 mlrd dollardan asqan. Memleket basshysynyń aıtýynsha, yntymaqtastyqty odan ári nyǵaıtý arqyly ózara saýda kólemin eki esege arttyrýǵa múmkindik bar.
Yonhap: Ońtústik Koreıa men Qazaqstan Koreıanyń táýelsizdigi úshin kúres tarıhyna qatysty nysandardy birge saqtaıdy
Ońtústik Koreıa men Qazaqstan Koreıanyń táýelsizdik qozǵalysyna qatysty Qazaqstan aýmaǵyndaǵy tarıhı nysandardy birlesip saqtaý jóninde kelisti. Bul týraly Yonhap agenttigi habarlady.
Tıisti memorandýmǵa Ońtústik Koreıanyń Patrıottar jáne ardagerler isteri mınıstri Kvon O Yl men Qazaqstannyń Mádenıet jáne aqparat mınıstri Arman Qyryqbaev Prezıdent Qasym-Jomart Toqaevtyń Seýlge sapary kezinde qol qoıdy.
Eki el tarıhı qujattar men mádenı mura nysandaryn saqtaýǵa, sondaı-aq akademııalyq almasýlardy keńeıtýge kelisti. Qazaqstanda Koreıanyń táýelsizdik qozǵalysyna qatysty 25 nysan bar. Olardyń qatarynda 1943 jyly Qyzylordada qaıtys bolǵan Koreıanyń táýelsizdigi úshin kúresken qolbasshy Hon Bom Doǵa arnalǵan memorıaldyq park te bar.
Qazir Ońtústik Koreıa búkil álem boıynsha eldiń táýelsizdik qozǵalysyna qatysty myńnan astam tarıhı nysandy zerttep jatyr.
Al Jazeera: Ońtústik Koreıa Ortalyq Azııa elderimen baılanysty nyǵaıtýǵa umtylyp otyr
Ońtústik Koreıa Ortalyq Azııanyń barlyq bes memleketiniń basshylaryn alǵashqy prezıdentter sammıtine jınap, óńirmen mańyzdy paıdaly qazbalar, energetıka, tehnologııa jáne kólik salalaryndaǵy yntymaqtastyqty tereńdetýge umtylyp otyr. Bul týraly Al Jazeera habarlady.
Sammıtke Ońtústik Koreıa Prezıdenti Lı Chje Men, Qazaqstan, Ózbekstan, Qyrǵyzstan, Tájikstan jáne Túrikmenstan basshylary qatysty. Bul 2007 jyly bastalǵan kelissózdiń jalǵasy sanalady.
Ortalyq Azııa elderi óz ónerkásibin damytý úshin ınvestıtsııa men tehnologııa tartýǵa múddeli bolsa, Seýl strategııalyq mańyzdy materıaldardy jetkizý tizbegin ártaraptandyrýǵa jáne Qytaıǵa táýeldilikti azaıtýǵa múddeli.
Nazarbaev Ýnıversıtetiniń saıasattanýshysy Sabına Eńsebaevanyń pikirinshe, Ortalyq Azııa Ońtústik Koreıaǵa strategııalyq mańyzdy mıneraldar, energetıkalyq resýrstar, óndiristi ártaraptandyrýǵa múmkindik beretin balama alańdar usyna alady. Al Koreıa óz kezeginde óńirge tehnologııa, kapıtal jáne óndiristik tájirıbe bere alady.
The Korea Herald: Qazaqstan men Koreıa munaı jáne atom energetıkasy salalaryndaǵy yntymaqtastyqty keńeıtpek
Ońtústik Koreıa men Qazaqstan energetıkalyq qaýipsizdik, strategııalyq mańyzdy paıdaly qazbalardy ıgerý jáne atom energetıkasy baǵyttaryndaǵy yntymaqtastyqqa súıene otyryp, ekijaqty qarym-qatynasty perspektıvaly jan-jaqty strategııalyq seriktestik deńgeıine kóterýge kelisti. Bul týraly The Korea Herald jazdy.
Basylymnyń málimetinshe, bul týraly eki el prezıdenti Seýldegi sammıtte málimdegen. Bul 2009 jyly strategııalyq áriptestik ornaǵannan beri ekijaqty qarym-qatynastardy jańa deńgeıge kóterý baǵytyndaǵy alǵashqy iri qadam.
— Qazaqstan tek energetıkalyq resýrstarǵa baı el retinde ǵana emes, sonymen birge Koreıa Respýblıkasynyń ekonomıkalyq qaýipsizdigi úshin mańyzdy seriktes, — dedi Lı Chje Men.
Taraptar energııa óndirý salasyndaǵy birlesken jobalardy damytyp, Qazaqstannyń strategııalyq mańyzdy mıneraldyq resýrstaryn Ońtústik Koreıanyń óndiristik múmkindikterimen ushtastyrýdy kózdeıdi. Atom energetıkasy salasyndaǵy kelisimder reaktor tehnologııalaryn, shaǵyn modýldik reaktorlardy jáne ıadrolyq otynnyń turaqty jetkizilimin de qamtıdy.
The Times of Central Asia: Toqaevtyń Seýlge sapary kezinde Qazaqstan Ońtústik Koreıa ınvestıtsııasyn tartty
The Times of Central Asia Qazaqstannyń strategııalyq mańyzdy paıdaly qazbalardy óndirý salasyna Ońtústik Koreıadan kóbirek ınvestıtsııa tartýǵa umtylyp otyrǵanyn jazdy.
Qazaqstan paıdaly qazbalardyń eleýli qoryna ıe bolsa, Ońtústik Koreıaǵa avtomobıl, akkýmýlıator, elektronıka jáne jartylaı ótkizgishter óndirisi úshin shıkizattyń senimdi jetkizilimi qajet.
Bul baǵyttaǵy yntymaqtastyq qazirdiń ózinde keńeıip keledi. «Taý-Ken Samuryq» kompanııasy men Koreıanyń Geologııa jáne mıneraldyq resýrstar ınstıtýty geologııalyq barlaý jáne shıkizatty óńdeý tehnologııalaryn damytý baǵytynda jumys istep jatyr. Sonymen qatar Almatyda sırek jáne strategııalyq metaldar boıynsha birlesken zertteý ortalyǵy qurylyp jatyr.
Qazaqstannyń avtomobıl jáne energetıka salalarynda Hyundai men Kia sekildi ońtústikkoreıalyq kompanııalar da keńinen jumys isteıdi.
Basylymnyń jazýynsha, endigi mindet — Koreıanyń Qazaqstannyń mıneraldyq resýrstaryna artyp otyrǵan qyzyǵýshylyǵyn óndirý men óńdeý boıynsha aýqymdy kommertsııalyq jobalarǵa aınaldyrý.
Anadolu: Ońtústik Koreıa men Qazaqstan atom energetıkasy jáne strategııalyq mańyzdy mıneraldar boıynsha kelisimge keldi
Anadolu agenttigi Ońtústik Koreıa men Qazaqstannyń atom energııasyn beıbit maqsatta paıdalaný jónindegi yntymaqtastyq týraly kelisimge qol qoıǵanyn habarlady.
Eki el kóshbasshylary strategııalyq mańyzdy paıdaly qazbalar, jasandy ıntellekt jáne basqa da mańyzdy salalardaǵy yntymaqtastyqty tereńdetýge kelisti.
— Qazaqstan energetıkalyq resýrstarǵa baı, sondaı-aq bolashaqqa baǵyttalǵan ozyq salalarda áleýeti zor el. Bul ony Koreıanyń ekonomıkalyq qaýipsizdigin qamtamasyz etýdegi negizgi seriktesine aınaldyrady, — dedi Lı Chje Men.
Seoul Economic Daily: Koreıanyń táýelsizdik qozǵalysyna qatysty tarıhı nysandardy saqtaý týraly kelisim jasaldy
Ońtústik Koreıa men Qazaqstan Koreıanyń táýelsizdik qozǵalysyna qatysty Qazaqstan aýmaǵyndaǵy tarıhı nysandardy saqtaý jáne basqarý jóninde kelisimge keldi. Bul týraly Seoul Economic Daily habarlady.
Taraptar tarıhı oryndarda zertteý júrgizip, olardy mádenı mura nysandarynyń tizilimine engizý boıynsha jumys isteýge, sondaı-aq birlesken ǵylymı zertteýler men osy oryndarǵa qyzyǵýshylyqty arttyratyn baǵdarlamalardy keńeıtýge nıetti.
Ońtústik Koreıanyń Patrıottar jáne ardagerler isteri mınıstri Kvon O Yldiń aıtýynsha, bul kelisim shetelde óz Otanynyń táýelsizdigi úshin kúresken tulǵalardyń tarıhı murasyn saqtaýǵa berik negiz qalyptastyrady.
Memorandým 2026 jylǵy «Koreıa — Ortalyq Azııa» sammıti aıasynda jasaldy. Qujat sonymen birge ardagerlerdi qoldaý jáne tarıhı jadyny saqtaý máselelerindegi ekijaqty yntymaqtastyqty nyǵaıtpaq.
The Korea Herald: Ońtústik Koreıa men Shin-Line Group Qazaqstanda azyq-túlik klasterin damytady
Taraptar klasterdi damytý, sondaı-aq eki eldiń naryǵyna shyǵatyn azyq-túlik kompanııalaryna keńes berý jáne qoldaý kórsetý baǵyttarynda yntymaqtaspaq.
Ortalyq Azııadaǵy iri balmuzdaq óndirýshilerdiń biri sanalatyn Shin-Line Qazaqstanda CU dúkender jelisiniń shamamen 70 núktesin de basqarady. Bul jeli ońtústikkoreıalyq azyq-túlik ónimderin qazaqstandyq tutynýshylar arasynda ilgeriletý úshin paıdalanylmaq.
— Biz eki eldiń azyq-túlik kompanııalaryna jańa naryqtarǵa shyǵýǵa jáne damýǵa múmkindik beretin praktıkalyq yntymaqtastyq tetigin qalyptastyramyz, — dedi agenttik tóraǵasy Kım Dok Ho.
Korea JoongAng Daily: Lı Chje Men Qazaqstan jáne Túrikmenstanmen energetıkalyq yntymaqtastyqty kúsheıtedi
Eki el munaı jetkizý, geologııalyq barlaý, munaı-gaz ken oryndaryn ıgerý, ıadrolyq otyn jetkizý tizbegin qalyptastyrý jáne taza energetıka tehnologııalaryn damytý baǵyttarynda yntymaqtaspaq.
Sammıt qorytyndysynda Qazaqstan men Ońtústik Koreıa arasyndaǵy ekijaqty qarym-qatynas perspektıvaly, bolashaqqa baǵdarlanǵan jan-jaqty strategııalyq seriktestik deńgeıine kóterildi.
Yntymaqtastyqty strategııalyq mańyzdy mıneraldar, jasandy ıntellekt, ǵylym jáne tehnologııa salalarynda keńeıtý josparlanyp otyr.
UPI: Ońtústik Koreıa Qazaqstanmen qarym-qatynas deńgeıin kóterip, Túrikmenstanmen yntymaqtastyǵyn keńeıtti
Ońtústik Koreıa Prezıdenti Lı Chje Men Qazaqstan jáne Túrikmenstan basshylarymen jeke kezdesýler ótkizip, olardyń qorytyndysy boıynsha energetıka, strategııalyq mańyzdy mıneraldar, jasandy ıntellekt jáne ınfraqurylym salalarynda birqatar kelisimge qol qoıyldy. Bul týraly UPI habarlady.
Olardyń qatarynda munaı jetkizý jáne atom energııasyn beıbit maqsatta paıdalaný jónindegi ýaǵdalastyqtar bar. Sońǵysy atom elektr stantsııalary men shaǵyn modýldik reaktorlardy qamtıdy.
Seýldiń baǵalaýynsha, bul kelisimder ońtústikkoreıalyq kompanııalardyń Qazaqstandaǵy bolashaq atom energetıkasy jobalaryna qatysýyna múmkindik ashýy múmkin.
Lı Chje Men sondaı-aq Túrikmenstan Prezıdenti Serdar Berdimuhamedovpen kezdesti. Eki el ınvestıtsııa, ınfraqurylym jáne basqa da salalar boıynsha 13 kelisimge qol qoıdy.
Olardyń qatarynda 16 jylǵa sozylǵan kelissózderden keıin jasalǵan ınvestıtsııalardy qorǵaý týraly kelisim bar. Lı Chje Men ońtústikkoreıalyq kompanııalardyń Túrikmenstandaǵy iri ónerkásiptik, ınfraqurylymdyq jáne temirjol jobalaryna qatysýyna qyzyǵýshylyq bildirdi.
The Korea Times: Seoul Cyber University basshysy Qazaqstannyń «Dostyq» ordenimen marapattaldy
The Korea Times basylymynyń habarlaýynsha, Seoul Cyber University prezıdenti Lı San Gıýn onlaın-bilim berýdi jáne Ońtústik Koreıa men Qazaqstan arasyndaǵy qarym-qatynastardy damytýǵa qosqan úlesi úshin Qazaqstannyń «Dostyq» ordenimen marapattaldy.
Memlekettik nagradany Prezıdent Qasym-Jomart Toqaev Ońtústik Koreıaǵa «Koreıa — Ortalyq Azııa» alǵashqy sammıtine qatysý úshin barǵan sapary barysynda tabystady.
— Men eki el arasyndaǵy bilim jáne mádenı almasýdy keńeıtýge, sondaı-aq keleshek urpaqtyń birge damýyna múmkindik beretin yntymaqtastyqtyń negizin qalyptastyrýǵa jumysymdy jalǵastyramyn, — dedi Lı San Gıýn.
Seoul Cyber University Qazaqstanmen kóp jyldan beri yntymaqtastyq ornatyp keledi. 2021 jyly eki el arasyndaǵy dıplomatııalyq qarym-qatynastardyń 30 jyldyǵyna oraı Seýldegi ýnıversıtet kampýsynda qazaq aqyny Abaı Qunanbaıulynyń músini ornatylǵan.
Business Korea: Hyundai Engineering Qazaqstandaǵy gaz jobasy boıynsha kelisimge qol qoıdy
Hyundai Engineering pen qazaqstandyq ulttyq kompanııa QazaqGaz Qarashyǵanaq gaz óńdeý zaýyty jobasyn iske asyrý jóninde kelisimge qol qoıdy. Bul týraly Business Korea habarlady.
Joba boıynsha kásiporyn jylyna 5 mlrd tekshe metr shıki gaz óńdeýge tıis.
Hyundai Engineering ıtalııalyq EPC-kompanııa SICIM-niń qazaqstandyq bólimshesimen birlesip konsortsıýmǵa jetekshilik etedi.
Hyundai Engineering jobalaý jáne satyp alýǵa jaýap berse, qurylys jáne iske qosý-baptaý jumystaryn kompanııalar birlesip atqarady.
Kelisim Prezıdent Qasym-Jomart Toqaevtyń qatysýymen ótken Qazaqstan–Koreıa iskerlik dóńgelek ústeli barysynda jasaldy.
The Times of Central Asia: Qazaqstan men Ońtústik Koreıa qarym-qatynasyn ne kútip tur?
The Times of Central Asia Ońtústik Koreıa men Ortalyq Azııanyń bes memleketi jıyrma jylǵa jýyq jalǵasyp kele jatqan yntymaqtastyqty memleket basshylary deńgeıine shyǵarǵanyn jazdy.
Alty el strategııalyq mańyzdy mıneraldardy óndirýmen qatar, olardy óńdeý jáne daıyn ónimdi jergilikti jerde óndirýdi qamtıtyn jetkizý tizbegin nyǵaıtýǵa kelisti.
— Koreıa tájirıbesiniń shynaıy qundylyǵy burynǵy úlgini sol kúıinde kóshirýde emes, daryndy jastardy, startaptardy, venchýrlik kapıtaldy jáne tehnologııalyq kásipkerlikti qoldaýdyń zamanaýı tetikterinde, — dedi ál-Farabı atyndaǵy Qazaq ulttyq ýnıversıtetiniń professory German Kım.
Energetıka salasyndaǵy yntymaqtastyq ta keńeıip keledi. Qazaqstan men Ońtústik Koreıa atom energııasyn beıbit maqsatta paıdalaný týraly kelisimge qol qoıdy. Qujat zertteý, qaýipsizdik, mamandar daıarlaý jáne bolashaqta shaǵyn modýldik reaktorlardy damytý baǵyttaryndaǵy ózara is-qımylǵa múmkindik beredi.
Taǵy bir mańyzdy qadam — Qazaqstannyń Ońtústik Koreıanyń jumysqa ornalasýǵa ruqsat berý júıesine (Employment Permit System) qosylýy. Kútilip otyrǵandaı 2028 jyldan bastap bul júıe qazaqstandyqtarǵa Ońtústik Koreıada zańdy túrde jumys isteýge múmkindik beredi.
Sammıt qorytyndysynda Seýl deklaratsııasyn qabyldaý josparlanyp otyr. Sonymen birge yntymaqtastyqtyń uzaq merzimdi nátıjesi qol jetkizilgen ýaǵdalastyqtardy naqty ınvestıtsııalyq jáne óndiristik jobalarǵa, turaqty kólik qatynasyna jáne jańa jumys oryndaryna aınaldyra alý múmkindigine baılanysty bolady.
Materıaldyń aǵylshyn tilindegi túpnusqasyn osy jerden oqýǵa bolady.
