Qazaqstan–Oman áriptestigi: energetıka, logıstıka jáne tsıfrlyq salalarǵa basymdyq berildi
ASTANA.KAZINFORM — Qazaqstan Respýblıkasynyń Premer-mınıstri Oljas Bektenov Qazaqstanǵa resmı saparmen kelgen Premer-mınıstriniń ekonomıkalyq máseleler jónindegi orynbasary Zııazın ben Haısam Ál Saıdpen kezdesti. Bul týraly Úkimettiń baspasóz qyzmeti málim etti.
Jıynda joǵary deńgeıde qol jetkizilgen ýaǵdalastyqtar sheńberinde saýda-ekonomıkalyq jáne ınvestıtsııalyq yntymaqtastyqty damytýǵa qatysty máseleler talqylandy.
— Memleket basshymyz Qasym-Jomart Toqaev Joǵary mártebeli Sultannyń Astanaǵa alǵashqy resmı saparyna aıryqsha mán beredi. Oman Sultandyǵy — Qazaqstannyń Taıaý Shyǵystaǵy jáne búkil arab álemindegi senimdi seriktesi. Qazaqstan Úkimeti Omanmen saýda-ekonomıkalyq yntymaqtastyqty belsendi damytý, ekijaqty qarym-qatynastardy nyǵaıtý, ınvestıtsııalyq baılanystardy keńeıtý jáne birlesken jobalardy júzege asyrý úshin qolaıly jaǵdaı jasaýǵa daıyn, — dep atap ótti Qazaqstan Premer-mınıstri Oljas Bektenov.
Kezdesýde energetıka, kólik-logıstıka, taý-ken óndirý, metallýrgııa, tsıfrlyq salalar, AÓK, týrızm jáne t. b. salalardaǵy ózara is-qımyldy keńeıtýge nazar aýdaryldy.
— Qazaqstan Respýblıkasy Prezıdentiniń qolynan «Dostyq» ordenin alý men úshin úlken mártebe boldy. Oman Sultandyǵy men Qazaqstan arasynda berik áriptestik baılanystar ornaǵan, biz olardy odan ári nyǵaıtýǵa jáne damytýǵa daıynbyz. Qazirdiń ózinde ınvestıtsııalyq yntymaqtastyq jolǵa qoıylǵan salalar bar. Biz sondaı-aq energetıka, jańartylatyn energııa kózderi, tehnologııalar, qarjy sektory sııaqty jáne basqa da baǵyttarǵa basymdyq berýdi josparlap otyrmyz, — dep atap ótti Oman Sultandyǵy Premer-mınıstriniń ekonomıkalyq máseleler jónindegi orynbasary Zııazın ben Haısam Ál Saıd.
Qazaqstan men Omannyń birlesken portfelinde quny $3 mlrd-ty quraıtyn 5 iri ınvestıtsııalyq joba, onyń ishinde energetıka jáne temirjol tasymaly salalarynda $1,1 mlrd bolatyn 2 joba iske qosyldy. Qazir kendi qaıta óńdeý salasyndaǵy jobalar júzege asyrylý satysynda.
Kelissózder barysynda taraptar saýda-ekonomıkalyq yntymaqtastyqty arttyrý maqsatynda kúsh-jiger biriktirýge múddeli ekenderin jetkizdi. Atap aıtqanda, kásiporyndardy jańǵyrtý men tehnologııalyq damytýǵa basa nazar aýdara otyryp, taý-ken óndirý jáne munaı-gaz salasynda birlesken bastamalardy júzege asyrý jónindegi josparǵa nazar aýdaryldy.
Qazaqstannyń Orta dálizdiń tranzıttik-kóliktik áleýetin damytý boıynsha júrgizip jatqan jumystaryn eskere otyryp, logıstıka salasyndaǵy túıisý núkteleri belgilendi. Eki memlekettiń ekonomıkasy men ózara saýdanyń damýyna óńdeý kásiporyndaryn qurý, aýyl sharýashylyǵy salasyndaǵy tehnologııalarmen almasý jáne aýyl sharýashylyǵy ónimderin jetkizý týraly uzaq merzimdi kelisimder jasasý jónindegi birlesken sharalar da yqpal etedi.
GovTech jáne jasandy ıntellekt salasyndaǵy jobalardy júzege asyrýǵa basymdyq berilip otyrǵan tsıfrlyq sala perspektıvaly baǵytardyń biri bolyp tanylyp otyr.
Ekotýrızmdi, qonaq úı jáne servıstik bıznesti damytýda, mádenı jáne tabıǵı kórikti jerlerdi nasıhattaýda tájirıbe almasýdyń mańyzdylyǵy atap ótildi.
Taraptar Qazaqstan men Oman arasyndaǵy barlyq basym baǵyttar boıynsha yntymaqtastyq pen áriptestikti odan ári nyǵaıtýǵa beıildiligin rastady.
$3 mlrd-tyq jobalar aıasynda ınvestıtsııalyq seriktestik
Kezdesý qorytyndysy boıynsha Qazaqstan Premer-mınıstri Oljas Bektenov pen Oman Sultandyǵy Premer-mınıstriniń ekonomıkalyq máseleler jónindegi orynbasary Zııazın ben Haısam Ál Saıdtyń qatysýymen «Samuryq-Qazyna» AQ men Oman Investment Authority arasynda ınvestıtsııalyq yntymaqtastyqtyń negizgi sharttary (Heads of Terms) týraly kelisimge qol qoıyldy.
Qujat birlesken ınvestıtsııalyq platformany qalyptastyrý, jańa qazaq-oman kásiporyndaryn, ınvestıtsııalyq qorlaryn jáne basymdyq negizde birlesip ınvestıtsııalaýdyń ózge de tetikterin iske qosý úshin ınstıtýtsıonaldyq negiz qalaıdy.
Kelisim ónerkásip, energetıka, densaýlyq saqtaý, logıstıka, taý-ken óndirý salasyn jáne taǵy da basqa qosa alǵanda, ekonomıkanyń basym sektorlarynda jobalardy júzege asyrýdy kózdeıdi. Investıtsııalardy Qazaqstan Respýblıkasy men Oman Sultandyǵynyń aýmaqtaryndaǵy qoldanystaǵy aktıvterge de, jańa jobalarǵa da baǵyttaý josparlanyp otyr.
Aıta keteıik, buǵan deıin Oljas Bektenov Almaty taý klasteri men Almaty Superski jobalaryn júzege asyrýdy jedeldetýdi tapsyrdy.
