«Qazaqstannyń zııatkerlik menshigi» jýrnalynyń mereıtoılyq nómiri jaryq kórdi (FOTO)
ASTANA. QazAqparat - Búgin Qazaqstan Ulttyq akademııalyq kitaphanasynda «Qazaqstannyń zııatkerlik menshigi» jýrnalynyń mereıtoılyq nómiriniń tusaýkeser rásimi ótti.
«Bıyl jýrnalymyzdyń eń birinshi nómiri shyqqanyna 10 jyl tolyp otyr. Búginde onyń ózindik oqyrmandary bar, olar ǵalymdar, ónertapqyshtar jáne zııatkerlik menshikke beı-jaı qaramaıtyn barsha qaýym dep aıtýǵa bolady. Jýrnalda elimizdegi ZM (zııatkerlik menshik) salasyndaǵy zańnamalarǵa arnalǵan birneshe aıdarlar bar, avtorlyq quqyq, ónerkásiptik menshik quqyǵy týraly mańyzdy máseleler kóteriledi. Sonymen qatar, bul basylym oqyrmandardy jańa ónertabystarmen, jańa jobalarmen tanystyrady. Jyldan jylǵa jýrnaldyń mazmuny men máni, formaty men dızaıny ózgerip, damyp keledi», - dep atap ótti «Ulttyq zııatkerlik menshik ınstıtýty» RMK dırektorynyń orynbasary Sáýle Júsipbekova.
Onyń aıtýynsha, jýrnal betterinen kez kelgen adam zııatkerlik menshik nysandaryn qorǵaý jóninde jan-jaqty málimetter men tegin konsýltatsııalar ala alady. Osy artyqshylyǵy da bul basylymdy tek ónertapqyshtar men ǵalymdar arasynda ǵana emes, jalpy oqyrman úshin de qyzyqty ete túsedi.
Aıta keteıik, QZM jýrnaly 2015 jyldyń 1 qantarynan bastap «Qazposhta» AQ arqyly taratylatyn merzimdi basylymdardyń jazylý katalogyna engizildi.
