Qazaqstannyń jol polıtsııasy jol qozǵalysyn baqylaý júıesin ońtaılandyrýda - Q. Tynybekov
ASTANA. Naýryzdyń 30-y. QazAqparat /Jasulan Amanbaıuly/ - Qazaqstannyń jol polıtsııasy jol qozǵalysyn baqylaý júıesin ońtaılandyrý sharalaryn qolǵa aldy.
Bul týraly búgin Іshki ister mınıstrliginiń Jol polıtsııasy komıtetiniń qoǵamdyq keńesinde komıtet basshysy Qaırat Tynybekov málim etti, dep habarlaıdy QazAqparat.
Onyń atap kórsetkenindeı, byltyr Qazaqstannyń jeti qalasynda jol qozǵalysyn tek avtosholǵynshy ádisimen baqylaý tájirıbesi engizilgen. «Bul ádis - kólik qozǵalysynyń ishinde júrip, jol erejelerin buzýdyń aldyn alýǵa jáne ony eskertýge múmkindik berdi. Basqa da zańǵa qaıshy áreketterge qarsy jyldam is-qımyl jasaýǵa jol ashty», deıdi Q. Tynybekov.
2010 jyldyń ishinde 400 myń quqyq buzýshylyqtar anyqtaldy, sonyń qatarynda 12 myńǵa jýyǵy kólikti mas kúıinde júrgizý oqıǵalary. Іshimdik iship kólik basqarǵandardyń 8 myńy júrgizý kýálikterinen aıyryldy, 1,5 myńy ákimshilik qamaýǵa alynǵan.
Sońǵy on jyl ishinde Qazaqstanda 30 myńnan asa adam jol apatynan kóz jumǵan, al 160 myńy túrli jaraqattar aldy. Respýblıka boıynsha, joldaǵy qaýipsizdikti qamtamasyz etý jumystary kúsheıtilip, «Qaýipsiz jol», «Abaılańyzdar, balalar!» sııaqty aldyn alý sharalary uıymdastyrylady.
Qoǵamdyq uıym ókilderi, «Nur Otan» partıaısynyń músheleri keńes barysynda joldaǵy balalar jaraqattarynyń aldyn alý jáne jergilikti jol polıtsııasynyń jumysyna qatysty birqatar usynystardy ortaǵa saldy. Bul pikirler aldaǵy ýaqyttary jol polıtsııasynyń qyzmetin ońtaılandyrý boıynsha jasalatyn sharalardy oryndaý kezinde eskeriletin bolady.
