Qazaqstannyń joǵary tehnologııalyq ónimderin eksportqa shyǵarý jóninde kelisim jasaldy

ASTANA. QazAqparat - «KAZAKH INVEST» Ulttyq kompanııasy» AQ men «Qazaqstan ınjınırıng» Ulttyq kompanııasy» AQ Qazaqstanda eksportqa shyǵarý úshin óndirilgen joǵary tehnologııalyq ónimderdi alǵa jyljytý týraly kelisti.

           23 mamyrda «KAZAKH INVEST» Basqarma tóraǵasynyń orynbasary Meırjan Maıkenov pen «Qazaqstan ınjınırıng» UK» AQ Basqarma tóraǵasynyń orynbasary Vadım Shakshakbaev tıisti memorandýmǵa qol qoıdy.

         «Biz óz qyzmetimiz sheńberinde mashına jasaý salasyndaǵy taýarlardy shetelge ótkizý boıynsha keshendi qoldaý kórsetýdi josparlap otyrmyz. Aǵymdaǵy jylǵy tamyz aıynyń sońynda Reseı Federatsııasynda ótetin mamandandyrylǵan halyqaralyq áskerı-tehnıkalyq «ARMIıA-2017» kórmesinde Qazaqstan ınjınırıng quramyna kiretin jeti iri kásiporynnyń  tanystyrylymyn uıymdastyramyz», - dedi M. Maıkenov.

         «KAZAKH INVEST» Ulttyq kompanııasymen seriktestik Qazaqstan Respýblıkasy qorǵanys-ónerkásip kesheni kásiporyndarynyń ónimderin halyqaralyq naryqtarǵa shyǵarý úshin qajetti eksportqa memlekettik qoldaý kórsetý quraldaryn iske asyrý sheńberinde júzege asyrylady», - dep atap ótti óz kezeginde V. Shakshakbaev.

         Taraptar halyqaralyq saýda máseleleri jóninde ózara árekettestikti damytyp, shetelde ár túrli is-sharalar ótkizýde aqparattyq qoldaý kórsetýdi kózdep otyr.

KAZAKH INVEST sońǵy birneshe jyl boıy «Qazaqstan ınjınırıng» UK» AQ birqatar kásiporyndarynyń, atap aıtqanda «Evrokopter Qazaqstan ınjınırıng» JShS, «Qazaqstan Aselsan Injınırıng» JShS jáne «Tynys» AQ-nyń ónimderin eksporttyqqa shyǵarý boıynsha jumystar júrgizip keledi.