Qazaqstannyń joǵary oqý oryndarynyń ǵylymı jobalarǵa qatysý úlesi 57 paıyzǵa jetti

Búgin Parlament Senatynda «Ǵylym týraly» QR Zańynyń jáne    Údemeli ındýstrııalyq-ınnovatsııalyq damyý jónindegi  2010-2014 jyldarǵa memlekettik baǵdarlamanyń iske asyrylýy aıasynda ǵylym damýynyń jaı-kúıi men perspektıvalary» taqyrybyna arnalǵan konferentsııa barysynda sóz sóılegen Bilim jáne ǵylym mınıstri Baqytjan Jumaǵulov osylaı málim etti.

Mınıstrdiń aıtýynsha, 2 jylǵa jýyq ýaqyt ishinde «Ǵylym týraly» Zańdy júzege asyrý birqatar negizgi tetikterdi jasaýǵa múmkindik berdi. «Atap aıtqanda, birinshi - ǵylymdy basqarýdyń jańa modelin tolyq iske qosý. Álemdik ǵylymdy jáne Qazaqstan ekonomıkasynyń suranysyn taldaý negizinde Joǵary ǵylymı-tehnıkalyq komıssııa jańa basymdyqtardy bekitti. Jobalardy irikteýdiń, halyqaralyq saraptama jasaýdyń jańa krıterııleri belgilendi. Ǵalymdar forýmynda Elbasy bul modeldi «ǵylym salasyna serpin beretin ınstıtýtsıonaldy negiz» dep atady», - dedi B. Jumaǵulov.

Mınıstr aıtqan ekinshi basty tetik - ǵylymdy qarjylandyrýdyń jańa túrlerin engizý. B. Jumaǵulovtyń sózine qaraǵanda bular álemdik tájirıbege saı keledi jáne bizdiń ǵalymdardyń belsendiligin arttyrdy.

«Úshinshi tetik - zertteýshilerge alǵash ret sheteldik iri ǵylymı-tehnıkalyq aqparat resýrstaryna jol ashyldy. Thomson Reuters  (AQSh), Springer (Germanııa), Elsevier (Nıderlandy) Wiley-Blackwell (Ulybrıtanııa) kompanııalarymen ulttyq lıtsenzııalar men kelisimderge qol qoıyldy. Tórtinshi -  qazaqstandyq ǵylymnyń álemdik keńistikke birigýi.  Qazaqstannyń joǵary oqý oryndaryna jetekshi sheteldik ǵalymdardy shaqyrý, ǵalymdardyń ǵylymı mobıldigin damytý baǵdarlamalary iske asa bastady. Joǵary oqý oryndarynda ǵylymdy jedel damytý, stýdentterdi, magıstranttar men doktoranttardy ǵylymı zertteýlerge tartý jumystary bastaldy. Buǵan ǵylymı dárejeler men ataqtardyń jańa júıesine kóshý de áser etýde. Nátıjesinde joǵary oqý oryndarynyń ǵylymı jobalarǵa qatysý úlesi 2012 jyly 57 paıyzǵa jetti. Bul 2010 jyly 33 paıyz ǵana bolatyn», - dedi B. Jumaǵulov.

Vedomstvo basshysynyń paıymynsha, Qazaqstannyń  jetekshi ýnıversıtetteri men talantty jastary ǵylymdy damytýdyń basty kúshine aınalýda.