Qazaqstannyń joǵary oqý oryndaryna aýysatyndar úshin keshendi testileýge qatysýǵa ótinishter qabyldaý bastaldy
ASTANA. QazAqparat - Sheteldik JOO-lardan Qazaqstannyń joǵary oqý oryndaryna aýysýǵa tilek bildirýshiler úshin keshendi testileýge qatysýǵa ótinish qabyldaý bastaldy, dep habarlaıdy Ulttyq testileý ortalyǵynan.
"Bilim alýshylardy bilim berý uıymdarynyń úlgisi boıynsha aýystyrý jáne qaıta qabyldaý qaǵıdasyna sáıkes, sheteldik joǵary oqý oryndarynan aýysý nemese qaıta qabyldaý kezinde Qazaqstan Respýblıkasynda jalpy orta nemese tehnıkalyq jáne kásiptik bilim alǵan tulǵalar meńgerilgen oqý baǵdarlamalary týraly qujatty, bally belgilengen ótý balynan tómen emes Ulttyq biryńǵaı testileýdiń nemese keshendi testileýdiń sertıfıkatyn usynady. Osyǵan oraı, bul sanattaǵy tulǵalar úshin 2015 jyldyń 25-28 tamyz aralyǵynda 19 joǵary oqý oryndarynyń bazasynda keshendi testileý ótkizildi", delingen habarlamada.
Ótinishterdi qabyldaý 2015 jyldyń 11-15 tamyz aralyǵynda ótkiziledi. Keshendi testileý aqyly túrde ótedi, onyń quny 2242 teńgeni quraıdy.
Testileý tórt pán boıynsha ótkizildi, test tapsyrmalarynyń jalpy sany - 100:
1. Qazaq nemese orys tili (oqyǵan tili) - 25 test tapsyrmasy; 2. Matematıka - 25 test tapsyrmasy; 3. Qazaqstan tarıhy - 25 test tapsyrmasy; 4. Tańdaý páni tańdaǵan mamandyǵyna baılanysty - 25 test tapsyrmasy.
Testileý nátıjesi boıynsha árbir qatysýshy barlyq pán boıynsha jınaǵan balldary kórsetilgen sertıfıkat alady.
"Qajetti ballyn jınaǵan soń jáne aýysý erejesiniń basqa da talaptaryn saqtaı otyryp, stýdentter sheteldik joǵary oqý oryndarynan Qazaqstan Respýblıkasynyń joǵary oqý oryndaryna aýysýyn júzege asyra alady", dep naqtylanǵan habarlamada.
