Qazaqstannyń joǵarǵy zań biliminiń jáne quqyqtyq ǵylymynyń sańlaǵy, akademık Salyq Zımanov ómirden ozdy

Salyq Zımanuly 1921 jyly 19 aqpanda Atyraý qalasynda ómirge keldi. 1938 jyly Jambyl atyndaǵy orta mektepti bitirip, Fort-Shevchenko qalasyndaǵy qazaq orta mektebinde matematıka men fızıka pániniń muǵalimi bolyp jumys jasady. 1939 jyly Grýzııada áskerı boryshyn ótedi, 1941-45 jyldary Uly Otan soǵysyna qatysyp, 4 ret jaralanǵan. Eren erligi úshin Uly Otan Soǵysynyń I dárejeli ordenimen, Qyzyl Juldyz ordenimen, «Za ýchastıe v geroıcheskoı oborone Kavkaza», «Za ýchastıe v geroıcheskom shtýrme ı vzıatıı Kenıgsberga» medaldarymen marapattaldy. Áskerı boryshyn artıllerııalyq polk shtabynyń bastyǵy bolyp aıaqtaǵan Salyq Zımanuly beıbit ómirde Qazaqstannyń joǵarǵy zań biliminiń jáne quqyqtyq ǵylymynyń patrıarhy degen atqa ıe boldy. 1948 jyly syrttaı Búkilodaqtyq zań ınstıtýtyn bitirip, QazKSR UǴA óz qyzmetin bastaǵan ǵalym 1961 jyly zań ǵylymynyń doktory, 1963 jyly professor, 1967 jyly QR UǴA akademıgi atandy. Onda 1948-50 jyly aspırantýradada oqyǵan ǵalym 1950 jyly quqyq sektorynyń bastyǵy, 1951-52 jyldary Fılosofııa jáne quqyq sektorynyń birinshi basshysy boldy. Odan keıin Almaty zań ınstıtýtynyń dırektory (1952-1954), QazMÝ zań fakýltetiniń dekany (1955-1956), QazKSR ǴA Fılosofııa jáne quqyq ınstıtýtynyń dırektory (1958-1969), QazKSR ǴA Prezıdıýmynyń basty ǵylymı keńesshisi (1976-77), UǴA memleket jáne quqyq ınstıtýtynyń uıymdastyrýshysy boldy, 1950 jyldan bastap osy ınstıtýttyń memleket jáne quqyq teorııasy men tarıhy bólimin basqardy. 1991 jyldan onyń qurmetti dırektory bolyp jumys jasaǵan S. Zımanov QR Joǵarǵy Keńesiniń depýtattyǵyna (1990-1994) saılandy. 200 astam ǵylymı eńbekterdiń, onyń ishinde 12 monografııanyń avtory. Ol Qazaq KSR memlekettik egemendigi týraly Deklaratsııanyń jobasyn daıyndaý komıssııasyna jetekshilik etti. Onyń tikeleı qatysýymen mańyzdy saıası qujat - «Qazaqstan Respýblıkasynyń memlekettik táýelsizdigi týraly» Konstıtýtsııalyq zań daıyndaldy. Ol memlekettiń jańa Konstıtýtsııasynyń jobasyn daıyndaýda sarapshylar tobyn basqardy. Dúnıejúzine iri ǵalym-zańger, pedagog jáne ǵylymdy uıymdastyrýshy retinde tanymal bolǵan S. Zımanuly - Prezıdenttiń Beıbitshilik jáne rýhanı kelisim syılyǵynyń laýreaty, Sh.Ýálıhanov atyndaǵy Qazaq KSR Ǵylym Akademııasy syılyǵynyń, QR Memlekettik syılyǵynyń laýreaty jáne Atyraý oblysynyń jáne Almaty qalasynyń qurmetti azamaty atandy.