Qazaqstannyń jobasy Eýropalyq poshtalar qaýymdastyǵynyń syılyǵyn ıelendi
ASTANA. QazAqparat - «Qazposhta» AQ-nyń «Sálemdemeler sýpermarketi» jobasy PostEurop Innovation Award 2018 syılyǵynda eń úzdik ınnovatsııalyq jobalar qatarynan kórindi, dep habarlaıdy QazAqparat tilshisi.
«Bizdiń «Sálemdemeler sýpermarketi» jobasy PostEurop Innovation Award 2018 syılyǵynda eń úzdik ınnovatsııalyq joba syılyǵyna ıe boldy. Búginde Qazaqstan boıynsha 214 sálemdeme sýpermarketi jumys isteıdi. Jańa tehnologııanyń arqasynda sálemdemeni jiberý men alý jáne berý ýaqyty 2-3 mınýtqa deıin qysqardy», - dep jazdy «Qazposhta» AQ-nyń basqarma tóraǵasy Sáken Sársenov Feısbýktegi paraqshasynda.
Aıta ketsek, PostEurop Innovation Award syılyǵy búkilálemdik poshta odaǵynyń quryltaıshysy Eýropalyq qoǵamdyq poshtalyq operatorlar qaýymdastyǵynyń uıymdastyrýymen 2017 jyldan bastap beriledi. Syılyq poshta ındýstrııasyna qajetti jańa tujyrymdamalar, ıdeıalar almasý men PostEurop músheleriniń úzdiksiz ózara árekettesýin qamtamasyz etýge baǵyttalǵan.
Buǵan deıin, Qazposhta basshysy búginde elimizde 111 franchaızıng núkteleriniń ashylǵanyn habarlaǵan bolatyn. Ondaǵy maqsat - halyqty qoljetimdi jerden poshta qyzmetimen qamtý.
Onyń sózine qaraǵanda endi poshta bólimshelerine barmaı-aq, sálemdemelerdi alýǵa nemese jiberýge, áýe jáne temirjol bıletterin satyp alýǵa, sondaı-aq, kommýnaldyq tólemderdi jáne salyqtardy tóleýge bolady. Sonymen qatar, jeke kásipkerler dúkenderinde, janar-jaǵarmaı quıý stantsııalarynda jáne basqa da jerlerde Qazposhtanyń qyzmetterin paıdalanyp, sondaı-aq óz taýarlaryn sata alady.
