Qazaqstannyń jetistikterin maqtanysh tutamyz - Ózbekstan elshisi
ASTANA. QazAqparat - Ózbekstan Respýblıkasy táýelsizdiginiń 27 jyldyǵyna oraı Astanada elshiniń arnaıy qabyldaýy ótti, dep habarlaıdy QazAqparat tilshisi.
«Eń aldymen Ózbekstan respýblıkasynyń táýelsizdiginiń 27 jyldyǵyna oraı Ózbekstan halqyna joldaǵan shyn júrekten quttyqtaýy úshin Qazastan Respýblıkasynyń joǵary mártebeli Prezıdentine alǵysymdy bildirgim keledi. Sondaı-aq barsha qonaqtarǵa bizdiń shaqyrýymyzdy qabyldap, búgingi is-sharaǵa qatysqandaryńyzǵa raqmet», - dep bastady óz sózin Ózbekstan Respýblıkasynyń Qazaqstandaǵy elshisi Saıdıkram Nııazhodjaev.
Kórshi ózbek memleketi tarıhı az ýaqyt kezeńinde táýelsiz memleketti qurýda jáne adam quqyqtary men bostandyqtaryn qamtamasyz etý men ulttyq memlekettilikti jáne rýhanı qundylyqtardy jandandyrý arqyly álemdik qaýymdastyqta laıyqty orynǵa ıe bolǵanyn aıta ketken jón.
Elshi myrza óz sózinde Ózbekstan eliniń jaqyn elderge qatysty ashyq, dostyq jáne pragmatıkalyq saıasat júrgizýde ekenin atap ótti. «Bul turǵyda Qazaqstanmen dostyq jáne jaqsy kórshilestikke negizdelgen tatý qarym-qatynasty joǵary baǵalaımyz. Sonymen qatar Qazaqstan basshysynyń saıası jáne ekonomıkalyq salalardaǵy jetistikterin maqtanysh tutamyz», - dedi ol.
Taǵy bir aıta keterligi, eki el arasyndaǵy taýar aınalymynyń joǵary qarqyny saqtalýda. Odan bólek yntymaqtastyq jónindegi úkimetaralyq komıssııanyń kezekti otyrysy ótýde. Oǵan dálel ústimizdegi jyldyń mamyr aıynda Shymkentte qazaq - ózbek iskerlik keńesiniń birinshi otyrysy ótti. Atalǵan keńestiń nátıjesinde eki eldiń isker toptary ókilderiniń arasynda belsendi baılanys ornap, Qazaqstan men Ózbekstannyń kásipkerler áıelderi arasynda yntymaqtastyq jandandy.
«Eki el arasyndaǵy ózara baılanys pen ashyqtyq eki memlekettiń áleýetin biriktirý bolyp tabylady. Buǵan dálel tarıhı etnıkalyq jáne mádenı baılanystardyń nyǵaıýy. Odan bólek, aımaqaralyq saýdanyń ósýi, bul óz kezeginde ekonomıkalyq baılanystyń joǵarylyǵyn kórsetedi», - dedi Saıdıkram Nııazhodjaev. «Qurmetti Qazaqstan Respýblıkasynyń Prezıdenti Nursultan Nazarbaevqa, Qazaqstannyń Úkimeti men Syrtqy ister mınıstrligine qonaqjaı qazaq jerinde jemisti jumys atqarýǵa barlyq jaǵdaılar jasaǵany úshin alǵysymdy bildirgim keledi», - dedi Ózbekstan elshisi.
Qazaqstan atynan Syrtqy ister mınıstriniń orynbasary Ǵalymjan Qoıshybaev óz kezeginde Ózbekstan Respýblıkasy táýelsizdiginiń 27 jyldyǵymen quttyqtady.
«Ózbekstan bizdiń baýyrlas memleket. Qazaqstan ekijaqty yntymaqtastyqty odan ári damytýǵa erekshe kóńil bóledi. Eki el arasyndaǵy ǵasyrlar boıy qalyptasqan baılanystardyń bolashaǵy zor. Joǵary deńgeıde qol jetkizilgen ózara túsinistik pen seriktestik aıtýly tabystarǵa jeteleýde. Osy jetistikterdiń odan ári ońtaıly jalǵasyn tabatynyna kámil senemiz», - dedi vıtse-mınıstr.
Aıta ketsek, bıyl elimizde Ózbekstan Respýblıkasynyń jyly atalyp ótilýde, tıisinshe kelesi, ıaǵnı 2019 jyly Ózbekstanda Qazaqstan jyly atalyp ótiledi.
