Qazaqstannyń jetistigi tek munaımen baılanysty emes - Baqytjan Temirbolat
Baqytjan Temirbolat mundaı pikirdi búgin Almatyda Ál-Farabı atyndaǵy Qazaq ulttyq ýnıversıtetinde ótken «Nazarbaev modeli» ǵylymı konferentsııasynda aıtty. Ǵylymı konferentsııa QR Tuńǵysh Prezıdenti - Elbasy kitaphanasynyń «N.Nazarbaev: dáýir, tulǵa, qoǵam» kóshpeli bilim berý jáne mádenı-aǵartýshylyq kórme jobasy aıasynda uıymdastyryldy.
Jıynda basty baıandama jasaǵan saıası ǵylymdarynyń kandıdaty Baqytjan Temirbolat táýelsiz Qazaqstandaǵy «Nazarbaev modeliniń» negizgi erekshelikterine toqtaldy.
«Búgingi sarapshylar Qazaqstannyń damý modelin «Nazarbaev modeli» dep aıtady. Bul kezdeısoq jasalǵan qorytyndy emes. Sebebi búgingi Qazaqstannyń damý jolyndaǵy baǵyttar Elbasynyń strategııalyq kózqarasy men kontseptýaldy sheshimderi arqasynda júzege asyp otyr. Mysaly, ıadrolyq qarýdan bas tartý, «Qazaqstan 2030» strategııalyq jobasyn ázirleý, astanany aýystyrý, syrtqy saıasattaǵy kóp vektorly baǵyt ustanymdaryn qalyptastyrý, Qazaqstannyń Eýrazııalyq ekonomıkalyq odaqqa múshe bolýy syndy taǵdyrsheshti sheshimderdi aıtýǵa bolady», - dedi ol.
Sondaı-aq, Baqytjan Temirbolat Qazaqstannyń qazirgi tájirıbesin HH ǵasyrdyń sońy men HHІ ǵasyrdyń basynda sátti modernızatsııalyq jobalarymen álem nazaryn aýdartqan Ońtústik Koreıa, Sıngapýr, Gonkong, Malaızııa syndy eldermen salystyrýǵa bolatynyn aıtty.
«Atalǵan ár memlekettiń sáttilik formýlasy da ártúrli. Mysaly, Qazaqstannyń jetistigin tek munaımen baılanystyrýshylar bar. Ol durys emes. Máselen, Venesýella - munaıdyń eń kóp qory bar memleket. Bul memleket álemdegi munaı qorynyń 17,5 paıyzyna ıelik etedi. Al, salystyrmaly túrde aıtsa, Qazaqstanda álemdik munaı qorynyń 1,80 paıyzy ǵana bar. Al, jahandyq básekege qabilettilik reıtıngi boıynsha 2017 jyly Venesýella 137 eldiń ishinde 127-orynda tur. Logıka boıynsha, eger eldiń gúldenýi shıkizatqa baılanysty bolsa Venesýella bul tizimde kósh bastap turýy kerek edi. Sol sııaqty, Nıgerııa. Álemdik munaı qorynyń 2,20 paıyzyn ıelenip otyrǵan el atalǵan reıtıngte 125 orynda qalǵan. Baıqap otyrǵanyńyzdaı, shıkizat baılaǵy eldiń gúldenýiniń birden bir kepili emes. Baılyqqa ıelik ete bilý bar da, onyń durys basqara bilý bar. Prezıdent Nazarbaev táýelsizdiktiń alǵashqy kúninen-aq, Qazaqstandy jańǵyrtý jolyn aıqyn kóre bildi. Osy jyldar ishinde eldiń damýy Prezıdenttiń baǵyt-baǵdarymen júrdi. Nazarbaevtyń basqarýy strategııalyq ádiske súıengen. Ideıadan áreketke, áreketten nátıjege deıin. «Nazarbaev modeli» pragmatıkalyq táýekelge negizdelgen», - dedi Baqytjan Temirbolat.
Baqytjan Temirbolat qazaq tiliniń latyn álipbıine aýysýy mádenı jańǵyrýdyń jańa joly bolatynyn aıtty.
«Bıyl biz Rýhanı jańǵyrý jobasyn júzege asyrýdy qolǵa aldyq. Onyń alǵashqy qadamdarynyń biri - qazaq tiliniń latyn álipbıine aýysýy. Bul qazaqstannyń mádenı jańǵyrýynda jańa jol bolady», - dedi ol.
Búgingi konferentsııa aıasynda M.Qasymbaekov, B.Temirbolat, T.Shaımergenov qurastyrǵan «Nazarbaev modeli» kitabynyń tusaýy kesildi. Sonymen qatar, «Álem tanyǵan Kóshbasshy» kitap kórmesi ashyldy. Onda N.Nazarbaevtyń álemniń birneshe tilinde jaryq kórgen kitaptary qoıyldy.
Eske sala keteıik, Elbasy kitaphanasynyń «N.Nazarbaev: dáýir, tulǵa, qoǵam» kóshpeli jobasy QR Tuńǵysh prezıdenti kúni jáne Táýelsizdik kúni merekesi qarsańynda Almatyda kóshpeli qor kórmesimen ashylǵan bolatyn. Onda QR Prezıdenti Nursultan Nazarbaevtyń jeke arhıvi, jeke kitaphanasy jáne Mýzeı qorynyń jádigerleri qoıylǵan. Kórme QR Ortalyq memlekettik murajaıynda 2018 jyldyń 14 qańtaryna deıin ashyq bolady. Sonymen qatar, atalǵan joba aıasynda 10-16 qarasha kúnderi halyqaralyq ǵylymı-tájirıbelik konferentsııalar, semınar-trenıngter ótkizildi.
