Qazaqstannyń jetistigi Nursultan Nazarbaev tulǵasymen berik baılanysty - Serbııa Prezıdenti Borıs Tadıch
ASTANA. Qazannyń 7-si. QazAqparat - Serbııa Prezıdenti Borıs Tadıch Qazaqstanǵa jasap otyrǵan alǵashqy sapary tabysty ótkenin atap kórsetti.
Bul týraly Serbııa Prezıdenti Aqordada Memleket basshysymen bolǵan kezdesýden keıin «Habar» telearnasyna bergen eksklıýzıvti suhbatynda málim etti, dep habarlady Prezıdenttiń baspasóz qyzmetinen.
- Sońǵy onjyldyqtarda Qazaqstan tań qalarlyq nátıjeler kórsetip otyr. Eske túsirer bolsaq, 20 jyl buryn Qazaqstan jalaqy jáne zeınetaqy tóleý problemalaryn bastan keshirgen bolatyn, al búginde jaǵdaı múldem basqasha. Bul damýdyń joǵary deńgeıi men eldiń jaqsy basshylyǵyn kórsetedi. Adamnyń bastamasynsyz eshnárse eshqashan ózdiginen júzege aspaıdy. Qazaqstannyń jetistigi Nursultan Nazarbaevtyń tulǵasymen berik baılanysty. Eldiń qandaı tabystarǵa qol jetkizip otyrǵanyn, qandaı ınfraqurylymdyq jobalar júzege asyrylǵanyn, adamdardyń turmys deńgeıi qalaı kóterilip otyrǵanyn men kórip otyrmyn. Nursultan Nazarbaev búginde - álem tanyǵan memleket qaıratkeri. Ol kisi óte qurmetti saıasatker jáne óz halqynyń jáne óz eliniń turmysyn jaqsartýǵa qosqan onyń eńbegin baıqamaý jáne baǵalamaý múmkin emes, - dedi Borıs Tadıch óz sózinde.
Ekijaqty qarym-qatynastardyń damýyna baǵa bergen Serbııa Prezıdenti, ekonomıkalyq yntymaqtastyqtyń áleýeti bolashaqqa perspektıvalyq josparlar jasaýǵa múmkindik berip otyrǵanyn atap kórsetti. Atap aıtqanda, farmatsevtıka, energetıka, aýyl sharýashylyǵy, qurylys jáne basqa da salalarda yntymaqtastyqtyń jańa múmkindikteri ashylyp otyr.
