Qazaqstannyń jetim balalaryn sheteldikterdiń asyrap alýy azaıyp keledi - R.Sher
ASTANA. 11 mamyr. QazAqparat - Ótken on jylda qazaqstandyq jetim balalardy kóbinese AQSh-tyń azamattary asyrap aldy.
Bul jaıynda búgin Astanada ótken «dóńgelek ústel» barysynda QR Bilim jáne ǵylym mınıstrligi Balalardyń quqyqtaryn qorǵaý komıtetiniń tóraıymy Raısa Sher málim etti.
Búginde Qazaqstanda 37 myńǵa jýyq jetim jáne ata-anasynyń qamqorlyǵynsyz qalǵan balalar bar. Onyń ishinde 23 myńnan astamy qazaqstandyq azamattardyń otbasylarynyń qamqorshylyǵynda, patronatty tárbıede júr. Al 12 925 bala búginde bilim berý, densaýlyq saqtaý, halyqty áleýmettik qorǵaý uıymdarynyń ınternattyq jaǵdaıynda tárbıelenip jatyr.
Onyń sózine qaraǵanda, 1998 jyly «Neke jáne otbasy týraly» Kodeks qabyldanǵannan beri Qazaqstanda 44 476 bala asyrap alyndy. 35 myńǵa jýyq balany qazaqstandyqtar óz baýyrlryna basqan, 523 balany basqa memleketterde turatyn týysqandary, al 8 805 balany sheteldikter asyrap aldy.
R. Sherdiń aıtýynsha, balalardy kóbinese AQSh azamattary asyrap alǵan. Olardyń úlesinde 6 myńnan astam bala bar. Odan keıingi orynda Ispanııa, Belgııa, Germanııa, Kanada, Irlandııa, Frantsııa jáne Italııa elderi tur.
Tóraıymnyń málimetterine qaraǵanda, qazirgi kezdegi jaǵdaı birshama ózgergen kórinedi. Balalardy asyrap alatyn sheteldikter sany qysqaryp otyr. 2010 jyly olar 506 balany baýyryna bassa, 2011 jyly bul kórsetkish 376-ǵa tómendedi. R. Sher buǵan asyrap alý boıynsha Gaaga konventsııasyn júzege asyrýǵa ázirlik aıasynda kútý kezeńi sebep bolǵanyn aıtyp ótti.
«Búginde 1,5 myń qazaqstandyq azamattar bala asyrap alýǵa kandıdat retinde tirkelip otyr. Bala asyraýǵa nıettilerdiń basym bóligi (95 paıyzy) aýqattylyq deńgeıi ortasha adamdar. Joǵary qoǵamdyq jáne materıaldyq jaǵdaıǵa qol jetkizgen azamattardyń tek 5 paıyzǵa jýyǵy ǵana jetim balalardy asyrap alýǵa nıetti»,-dedi ol.
