QAZAQSTANNYŃ JEŃІSKE QOSQAN ÚLESІ: Soǵys jyldarynda aýyl sharýashylyǵy óndirisi eselene tústi
Alaıda, eńbekke jaramdy er-azamatyn maıdanǵa attandyrǵandyqtan negizgi aýyrtpalyq qarttarǵa, áıelder men balalarǵa tústi. Tarıhı derekterge qaraǵanda, 1939 jylǵy sanaqpen salystyrǵanda 1942 jyly Qazaqstanda aýyl sharýashylyǵy eńbekshileriniń sany 600 myńǵa azaıǵan. Máselen, 1944 jyly keńsharlardaǵy eńbekke jaramdy erlerdiń sandyq úlesi - 20, áıelder - 58, jasóspirimder - 22 paıyz boldy. Soǵys jyldarynda elimizdiń aýyldary maıdanǵa tek azyq-túlik emes, sonymen birge tiri mal, tipti, aýyl sharýashylyǵy tehnıkasyn jiberip otyrdy. 1942-1943 jyldary aralyǵynda respýblıka aýyl sharýashylyǵynan 4111 traktor, 1184 júk mashınalary, 30318 jylqy maıdanǵa jiberildi. Tyldaǵy eńbekshiler joǵarydan berilgen jospardy oryndaý barysynda kúni-túni eńbek etti. Soǵystyń birinshi jyly memleketke 100 mln. put astyq tapsyryldy. Bul kórsetkish 1940 jylmen salystyrǵanda 24 mln. putqa artyq bolatyn. Eńbekkerler óz erkimen eńbek kúnin tańǵy besten, keshki 22.00-ke deıin uzartyp, árbir sharýa 2-3 adamnyń jumysyn atqardy. Máselen, tek bir Almaty oblysynyń 9 aýdanynyń 277 keńsharynda soǵysqa deıin 64369 adam eńbek etse, soǵys jyldary olardyń sany áıelder, qarııalar jáne balalar esebinen 68598 adamǵa deıin ósti.
Qazaqstannyń aýyl sharýashylyǵy maıdan qajeti úshin jumys istedi. 1942 jyly 450 myń gektar tyń jáne tyńaıǵan jer jyrtylyp, egistik aýdany 17 paıyzǵa ósti. 1943 jyly egistik kólemine 775000 gektar jer qosyldy. Aýyl sharýashylyǵynda eńbek etken Ybyraı Jaqaev, Shyǵanaq Bersıev, Kım Man Sam esimderi soǵys jyldarynda belgili boldy. 1943 jyly Sh.Bersıev bastaǵan tary ósirýshiler ár gektardan 201 tsentner ónim alyp, álemdik rekord jasady. Al Syrdarııa jerinde Y.Jaqaev kúrishtiń ár gektarynan 1260 put ónim aldy.
Aýylsharýashylyq eńbekkerleriniń sany 1939 jylmen salystyrǵanda 1942 jyly 600 myńǵa kemidi. Kolhoz óndirisinde áıelder eńbeginiń úlesi artyp, 1940 jylǵy 48 paıyzdyń ornyna 1942 jyly 75 paıyzǵa jetti. 76 myń mehanızatordyń 55 myńnan astamy áıelder boldy. Búkilodaqtyq sotsıalıstik jarysqa 10 myńnan astam traktorshy qyz-kelinshek qatysty.
Qazaqstandaǵy aýyl sharýashylyǵy shıkizatynyń moldyǵy jeńil jáne tamaq ónerkásibiniń damýy qarqynynyń joǵarlaýyna da oń áserin tıgizdi. Jambylda, Semeıde, Petropavlda, Pavlodarda teri ılep, bylǵary jasaıtyn, kásiporyndar, Almaty men Shymkentte maqta-mata kombınaty salyndy. Qaraǵandyda aıaq-kıim tigý men shulyq shyǵaratyn kásiporyndar oryn tepti. Jezqazǵanda, Semeıde, Aqtóbede toqyma fabrıkalary jumys isteı bastady. Atalǵan kezeńde Aqtóbede Shymkentte, Jambylda, Temirtaýda et kombınattary, ondaǵan sút, maı aıyratyn, irimshik qaınatatyn zaýyttar, iri naýbaıhanalar iske qosylady.
Soǵys jyldary bir adam maıdanǵa ketken birneshe adam ornyna jumys isteý qozǵalysyna, jumys ónimdiligin arttyrý barysynda memleket tarapynan uıymdastyrylǵan ártúrli jarystarǵa qazaqstandyq malshylar da kóptep tartyldy. Mysaly, 1942 jyly búkilodaqtyq malshylar jarysynan qazaqstandyqtar birinshi oryn aldy. Sandyq kórsetkish boıynsha 1942 jyldyń sońynda mal basy 1,5 mln. nemese 1942 jyldyń basyndaǵy kórsetkishten 17 paıyz artty. Mal basyn ósirýden Qyzylorda, Qaraǵandy, Pavlodar oblystary alda boldy.
Soǵys jyldary kolhozshylarǵa qarsy totalıtarlyq tártip tarapynan kóptegen sharalar da júzege asyrylady. 1941 jyldan bastap árbir kolhoz-sovhozdarda jergilikti saıası bólimder qurylyp, olar aýyl sharýashylyǵy josparlarynyń oryndalýyn qadaǵalap, josparyn oryndaı almaǵan sharýany jazalap otyrdy. Sonymen birge 1942 jyldan bastap kolhoz-sovhozdarda 12-16 jas arasyndaǵy jasóspirimderdiń eńbegi zańdastyrylyp, jumys josparyn oryndamaǵan jasóspirim qylmysker retinde jazalandy. Osyǵan qaramastan halyqtyń patrıottyq serpini totalıtarlyq júıe tártipterinen joǵary turdy.
Osylaısha, respýblıka ekonomıkasyn soǵys jaǵdaıyna kóshirý júzege asyryldy. Soǵystyń alǵashqy kúnderinen Qazaqstan maıdan arsenalyna aınalyp, maıdan men tyldy qarý-jaraqpen, oq-dárimen, azyq-túlikpen qamtamasyz etýshi aımaq boldy.
