Qazaqstannyń jemqorlyqty qabyldaý ındeksi boıynsha kórsetkishteri jaqsaryp keledi

ASTANA. QazAqparat - 2018 jyly Qazaqstan sybaılas jemqorlyqty qabyldaý Indeksi boıynsha synǵa túsken elder reıtınginde 31 upaı jınap 122 orynǵa taban tiredi. Sonyń arqasynda 2 upaımen óz kórsetkishin 9 satyǵa jańartty. Bul týraly QR Memlekettik qyzmet isteri jáne sybaılas jemqorlyqqa qarsy is-qımyl agenttigi apparatynyń basshysy Saıan Ahmetjanov málimdedi.

«Bul baǵa Transparency International Qazaqstannyń reıtıngine engennen bergi eń joǵarǵy kórsetkishi (1999 jyly - 23 upaı) bolyp tabylady. Osyndaı nátıjelerge qol jetkizý, 30 upaılyq ólshemmen esepteletin eń jemqor elder sanatynan shyǵyp ketýge múmkindik beredi»,-dedi Saıan Ahmetjanov.

Ol ótken jyldaǵydaı Qazaqstannyń sybaılas jemqorlyqty qabyldaý ındeksi 9 halyqaralyq reıtıng agenttikteriniń derekteri negizinde qurylǵanyn jetkizdi.

Transparency International sarapshylaryna silteme jasaı otyryp, ol Sybaılas jemqorlyqty qabyldaý ındeksiniń búkil álemdegi quldyraý kórsetkishteriniń janynda Qazaqstanda ilgerileýshilik baıqalǵanyn aıtty.

«Aıta keterligi, oń ózgeristerge eldegi sybaılas jemqorlyqqa qarsy is-tájirıbeni usynǵan árbir halyqaralyq uıymnyń ókilderine eldegi sybaılas jemqorlyqqa qarsy turý úshin qoldanylǵan mehanızmder men sharalardy tanystyrý arqyly qol jetkizildi»,-dedi spıker.