Qazaqstannyń jemqorlyqty baqylaý ındeksi 6 pozıtsııaǵa ósti

ASTANA. QazAqparat - Dúnıejúzilik bank álemniń 214 elindegi eń bedeldi, jyl saıynǵy «memlekettik basqarý ındıkatorlary» zertteýiniń nátıjesin jarııalady, dep habarlaıdy QazAqparat Antıkorǵa silteme jasap.

Baǵalaý 6 ındeks boıynsha júzege asyrylady: «Sybaılas jemqorlyqty baqylaý», «Memlekettik basqarýdyń tıimdiligi», «Zańnyń ústemdigi», «Retteýshi ortanyń sapasy», «Saıası turaqtylyq» jáne «Halyqtyń pikirin esepke alý jáne memlekettik organdardyń eseptiligi».

Nátıjeler protsentıl shkalasy boıynsha kórsetiledi – tómen kórsetkishteri bar elderdiń paıyzy jazylady.

Sybaılas jemqorlyqty baqylaý ındeksi boıynsha Qazaqstan kesteniń ortasynda óz ornyn aldy. Ótken reıtıngte bizdiń elden tómen nátıjeler elderdiń 42%-yn kórsetti, jańa reıtıngte – 48%.

Osylaısha, bir jyl ishinde Qazaqstan óz pozıtsııasyn 6 tarmaqqa jaqsartty, al jalpy sońǵy 5 jylda eki eseden astam ósim baıqalady. Aǵymdaǵy jyldyń kórsetkishi - elimizdiń osy reıtıngke qatysqan barlyq ýaqyt ishindegi eń joǵary kórsetkishi.

Bizdiń elden keıingi qatarda Argentına, Brazılııa, Indonezııa, Marokko, Serbııa, Túrkııa jáne basqa da memleketter ornalasqan.

Derekter Bertelsmann Stiftung, Economist Intelligence Unit, Freedom House, Gallup, IHS Markit World Economic Service, IMD, PRS Group, World Justice Project, World Economic Forum jáne Varieties of Democracy Project boıynsha esepteldi.