Qazaqstannyń jemqorlyqpen kúres tájirıbesi Tashkenttegi EYU otyrysynda usynyldy

TAShKENT. QazAqparat – Búgin Ekonomıkalyq yntymaqtastyq uıymy Jemqorlyqqa qarsy organdar basshylary men ombýdsmenderiniń 4-otyrysynda Qazaqstanda jemqorlyqqa qarsy saıasatty qalyptastyrý men júzege asyrýdyń basym baǵyttary týraly QR Sybaılas jemqorlyqqa qarsy is-qımyl agenttiginiń tóraǵasy Marat Ahmetjanov aıtyp berdi, dep habarlaıdy QazAqparattyń menshikti tilshisi.

Spıker táýelsiz Qazaqstannyń negizgi basymdyqtarynyń biri sybaılas jemqorlyqpen júıeli jáne birizdi kúres ekenin atap ótti.

«Barlyq zań jobalary men zańǵa táýeldi aktiler saraptamasynyń sybaılas jemqorlyqqa qarsy ınstıtýty tolyǵymen jumys isteı bastady, qol astyndaǵylardyń sybaılas jemqorlyǵy úshin basshylardyń jeke jaýapkershiligi ınstıtýty engizildi, kvazımemlekettik sektordaǵy komplaens-qyzmetterdiń mindetteri bekitildi. Sybaılas jemqorlyq úshin quqyq qorǵaý organdarynyń qyzmetkerleri, sottar, para berýshiler men sybaılas jemqorlyqqa deldal bolǵandarǵa qatysty sanktsııalar kúsheıtildi. Qyzmetkerlerge qylmysqa ıtermelegeni úshin qylmystyq jaýapkershilik engizildi. Jemqorlyq jasaǵandar ómir boıy memlekettik qyzmette jumys isteı almaıdy, aýyr jáne asa aýyr sybaılas jemqorlyq jasaǵany úshin sottalǵandardy jazany óteýden shartty túrde merziminen buryn bosatýǵa ruqsat joq», - dep aqparattandyrdy M. Ahmetjanov.

Sonymen qatar spıker sybaılas jemqorlyqpen kúres kezindegi tsıfrlandyrýdyń róline toqtalyp ótti.

Ekonomıkalyq yntymaqtastyq uıymy – halyqaralyq óńirlik ekonomıkalyq, mádenı, ǵylymı jáne tehnıkalyq yntymaqtastyq uıymy. Onyń quramyna 10 memleket kiredi: Qazaqstan, Ózbekstan, Túrkııa, Iran, Pákistan, Qyrǵyzstan, Tájikstan, Túrkmenstan, Ázerbaıjan jáne Aýǵanstan.