Qazaqstannyń jemqorlyqqa qarsy jańa strategııasy Elbasy qaraýyna usynylady
ASTANA. QazAqparat - Qazaqstannyń 2015-2025 jyldarǵa arnalǵan jemqorlyqqa qarsy jańa strategııasy Elbasy qaraýyna usynylady. Bul týraly búgin Halyqaralyq jemqorlyqpen kúres kúnine arnalǵan 1-shi jastar forýmynda QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Alık Shpekbaev aıtty.
«Qazaqstan óz táýelsizdiginiń alǵashqy kúnderinen-aq jemqorlyqqa qarsy maqsatty saıasat júrgizip keledi. Al onyń logıkalyq jalǵasy Memleket basshysynyń tapsyrmasymen ázirlengen 2015-2025 jyldarǵa arnalǵan jańa jemqorlyqqa qarsy strategııa bolmaq. Taıaý ýaqytta ol Prezıdent qaraýyna usynylady», - dedi A.Shpekbaev.
Onyń aıtýynsha, memlekettik qyzmetterdi kórsetý barysynda memlekettik qyzmette oryn alatyn jemqorlyqqa qarsy is-qımyl basymdyq bolyp otyr. Sonymen birge kvazımemlekettik jáne jeke sektordaǵy jemqorlyqqa qarsy turý da ózekti.
«Qoǵamdyq baqylaýdy kúsheıtý, aqparatqa qoljetimdilikti arttyrý, sot jáne quqyq qorǵaý organdaryndaǵy jemqorlyqtyń aldyn alý, jemqorlyqqa qarsy mádenıetti qalyptastyrý jáne halyqtyń quqyqtyq saýatyn arttyrý máseleleri de barynsha mańyzdy», - dedi agenttik tóraǵasynyń orynbasary.
