Qazaqstannyń jemqorlyqqa qarsy memleketter tobyna músheliginiń mańyzdylyǵy nede
Bul týraly QR Sybaılas jemqorlyqqa qarsy is-qımyl agenttigi tóraǵasynyń birinshi orynbasary Oljas Bektenov málim etti, dep habarlaıdy QazAqparat tilshisi.
«Depýtattyq korpýstyń qoldaýynyń arqasynda, kelisimdi ratıfıkatsııalaý týraly qujat Parlamenttiń qos palatasymen qysqa merzimde qabyldandy. 2019 jyldyń 30 jeltoqsanynda Memleket basshysy tıisti Zańǵa qol qoıdy. Osy sátten bastap Qazaqstan GREKO-nyń 50-shi jańa múshesi atandy», - dedi O. Bektenov Ortalyq kommýnıkatsııalar qyzmetindegi baspasóz máslıhatynda.
Osy oraıda ol atalǵan uıymǵa músheliktiń basymdyqtary týraly aıtyp berdi.
«Birinshi kezekte, Eýropa Keńesi sarapshylary sybaılas jemqorlyqqa qarsy zańnamaǵa únemi monıtorıng júrgizip túrady. Bul turǵyda álemdik úzdik tájirıbelerge, halyqaralyq normatıvtik-quqyqtyq aktilerge sáıkestik baǵyty nazarda bolady. Monıtorıngtiń árbir raýndynyń qorytyndysy boıynsha elimizge tıisti usynystar jasalady, ıaǵnı jemqorlyqqa qarsy is-qımyl tıimdiligin arttyrý maqsatynda zańnamaǵa ózgerister nemese uıymdastyrý sharalaryn qabyldaý qadamdary pysyqtalady», - dedi ol.
Belgili bolǵandaı, atalǵan usynystar men keńesterdi oryndaý úshin memleketke 18 aı merzimi beriledi. Sonymen qatar, bul merzimdi jarty jylǵa uzartý múmkindigi qarastyrylǵan. Osydan keıin sarapshylar usynystarynyń oryndalýy deńgeıine baǵa beriledi.
Aıta keteıik, GREKO-ǵa qosylý arqyly Qazaqstan sarapshylary da Eýropa Keńesiniń baǵalaý toptary quramyna enetin bolady. Bul rette GREKO-ǵa qatysýshy ózge de elderdegi monıtorıngtik sharalarda qamtylady.
Onyń sózine qaraǵanda, GREKO-ǵa qosylý Eýropa Keńesiniń sybaılas jemqorlyq úshin qylmystyq jaýapkershilik týraly konventsııasyn ratıfıkatsııalaýǵa jol ashady. Bul óz kezeginde qylmyskerlerdi ekstradıtsııalaý, olardyń zańsyz tapqan múlkin qaıtarý máseleleri boıynsha Eýropa elderimen yntymaqtastyqty kúsheıtýge múmkindik beredi.
Budan buryn habarlanǵandaı, ótken jyldyń sońynda Parlament Senatynyń jalpy otyrysynda «Qazaqstan men Eýropa Keńesi arasyndaǵy Sybaılas jemqorlyqqa qarsy memleketter toby ókilderiniń jáne baǵalaýshy toptar músheleriniń (GREKO) artyqshylyqtary men ımmýnıtetterine qatysty kelisimdi ratıfıkatsııalaý týraly» Zańy qabyldandy.
