Qazaqstannyń jemis-jıdek ónimderin Reseı keri qaıtaryp jiberdi
ASTANA. QazAqparat - Qazaqstan men Qyrǵyzstannan zańsyz tasymaldanǵan 300 tonnaǵa jýyq karantınge jatqyzylǵan ónim Reseı Federatsııasynyń Novosibir oblysy aýmaǵyna ótkizilmedi, dep habarlaıdy Reseıdiń mal dárigerlik jáne fıtosanıtarlyq baqylaý jónindegi federaldy qyzmeti.
Reseı aýyl sharýashylyǵy baqylaý basqarmasynyń málimetinshe, Qazaqstannan jáne Qyrǵyzstannan shyqqan avtokólikter 70 tonnaǵa jýyq shıe, 90 tonna sary órik, 58 tonna qyzanaq, 20 tonna kúrish qabyǵy jáne 3 tonna qyzylshany zańsyz jolmen Novosibir oblysynyń aýmaǵyna ótkizbekshi bolǵan.
Karantııalyq fıtosanıtarlyq baqylaý barysynda ónimderdiń oramalarynda ónimniń ataýy, óndirgen eli, eksporttaýshy jáne/nemese reeksporttaýshy jaıly aqparat beretin tańbalarynyń joqtyǵy anyqtaldy. Al kúrish qabyqtary jaramsyz fıtosanıtarlyq sertıfıkatpen tasymaldanǵan.
Júkter Qazaqstan jáne Qyrǵyzstan Respýblıkalaryna qaıtaryldy.
