Qazaqstannyń «jasyl» ekonomıkaǵa ótý jónindegi strategııasynyń jobasy 2013 jyly ázirlenedi

Global Green Growth Institute (GGGI) jáne QR Qorshaǵan ortany qorǵaý mınıstrligi byltyr Eýropa Qaıta Jańartý jáne Damý Bankimen jasalǵan kelisimniń negizinde «Ekologııalyq damýdyń qazaqstandyq jospary» atty joba bastaǵan. Ol Qazaqstan Úkimetiniń «jasyl» ekonomıka baǵytyndaǵy jumysyna qoldaý bildirýge arnalǵan. 

 «Bólek bir eldiń «jasyl» ekonomıkaǵa ótýi óte qıyn. Oǵan qoldanystaǵy ekonomıkalyq modeldi reformalaý jáne transshekaralyq máselelerdi sheshý boıynsha birlesken is-qımyldar qajet. Qazaqstan «jasyl» ekonomıkaǵa ótýdiń úlken múmkindikterine jáne asa joǵary áleýetke ıe», - deıdi Global Green Growth Institute jobalarynyń jetekshisi Sheırın ıÝn.    

 QR Qorshaǵan ortany qorǵaý mınıstrligi «Jasyl» tehnologııalar jáne ınvestıtsııalardy tartý departamentiniń bastyǵy Aınur Sospanovanyń aıtýynsha, Qazaqstanda «jasyl» ekonomıkaǵa ótý jónindegi strategııasynyń jobasy ázirlenýde.

 «Atalmysh semınar Qazaqstan ekonomıkasynyń úzdiksiz damýyn jáne  ekologııalyq turaqtylyǵyn qoldaýǵa baǵyttalǵan. 2012 jyly QR Prezıdenti Qazaqstannyń «jasyl» ekonomıkaǵa ótý jónindegi strategııasynyń jobasyn ázirleýdi tapsyrdy. Áýeli bul joba aqpan aıynda jasalýy tıis delingen bolatyn. Alaıda sarapshylar bul uzaqmerzimdi, sapaly  bolýy úshin oǵan budan kóp ýaqyt qajettigin túsindi, sondyqtan atalmysh joba kelesi jyldyń orta tusynda paıda bolyp, Úkimette, sonymen qatar vedomstvoaralyq deńgeıde talqylanady. Premer-Mınıstrdiń tóraǵalyq etýimen arnaıy jumys toby quryldy. Oǵan barlyq memlekettik organdar, mınıstrlikter, ÚEU men halyqaralyq sarapshylar toby enip otyr. Biz atalmysh qujattyń sapaly ári joǵary mártebege ıe bolatynyna senemiz. Ol uzaq merzimge arnalǵan jáne 2050 jylǵa deıingi ýaqytty qamtymaq», - dep atap ótti ol.