Qazaqstannyń «jasyl ekonomıkaǵa» kóshý strategııasy bir jyldyń ishinde daıyn bolady

Bul týraly búgin Qazaqstannyń turaqty damýyn qamtamasyz etý jáne «jasyl ekonomıka» prıntsıpterin engizý máselelerine arnalǵan semınar barysynda QR Qorshaǵan ortany qorǵaý mınıstri Nurlan Qapparov málim etti.

«Bizdiń mınıstrlik taıaýda Turaqty damý keńesi barysynda Qazaqstannyń «jasyl ekonomıkaǵa» kóshý múmkindigi týraly baıandama jasady. Oǵan qosa QR Prezıdenti N.Nazarbaev «jasyl ekonomıkaǵa» kóshý strategııasyn ázirleýge naqty tapsyrma berdi. Bul jaı ǵana qujat emes, ol ekonomıkanyń barlyq sektoryna da qatysty. Meniń oıymsha, atalǵan strategııany jasaýǵa 6-dan 12 aıǵa deıin ýaqyt ketedi. Osydan keıin ǵana bizde Qazaqstanda «jasyl ekonomıka» engizýdiń naqty jospary bolady», - dedi ol.

Onyń atap ótýinshe, ázirshe strategııaǵa qansha qarajatty qajet etetindigin aıtýǵa erte. Naqty bıýdjeti «jasyl ekonomıkany» engizý jospary ázirlengennen keıin belgili bolady.

«Biz álem elderiniń oń tájirıbelerin paıdalanamyz, bul rette Germanııa men Ońtústik Koreıany atap ótken oryndy. Olar «jasyl ekonomıkany» damytýda oń nátıjelerge qol jetkizip otyr. Búgingi tańda álemde ekologııaǵa qatysty kóptegen problema bar. Kúnsaıyn tabıǵı resýrstar azaıyp, qorshaǵan orta búlinýde. Sondyqtan da adamzat úshin jasyl ekonomıka kóshý mindetti bolyp otyr», - dep atap ótti mınıstr.