Qazaqstannyń jastar uıymy ekologııa salasyndaǵy halyqaralyq marapatqa ıe boldy
ASTANA. QazAqparat - EKSPO-2017 kórmesindegi Avstrııa pavılonynda pavlodarlyq «Jas gvardııa» qoǵamdyq qoryna ekologııa salasyndaǵy Energy Globe Award bedeldi halyqaralyq syılyǵy tabystaldy, dep habarlaıdy QazAqparat pavılonnyń baspasóz qyzmetine silteme jasap.
Marapatty Avstrııa elshiliginiń saýda keńesshisi Mıhael Mıýller tabys etti.
Energy Globe Award syılyǵynyń maqsaty - ekologııalyq ózgerister men tabıǵı resýrstardy tıimdi paıdalaný qajettigi týraly halyqty habardar etý. Baıqaýǵa jyl saıyn 178-ge jýyq memleket ókilderi qatysady. Bul syılyq ekologııa, energııanyń tıimdiligi jáne jańartylatyn energııa kózderi salasyndaǵy álemniń úzdik jobalaryn anyqtaıdy jáne marapatty ár jyldary Kofı Annan, Mıhaıl Gorbachev, Martın Shın, Peter Falk syndy tanymal tulǵalar alǵan.
Pavlodarlyq «Rodnoe Prıırtyshe» jobasy halyqaralyq uıymnyń barlyq maqsattaryna sáıkes keledi. Bul joba jastardy qorshaǵan ortany taza ustaý men tabıǵı baılyqqa uqypty qaraýǵa shaqyrady.
«Jobanyń negizgi maqsaty - qoǵam nazaryn Ertis ózeni basseıniniń tabıǵatyn zertteý men qorǵaýǵa aýdarý. Bizdiń bastama aıasynda Pavlodardyń 200-den astam mektep oqýshylary, stýdentter jáne ÚEU ókilderi Ertis ózeni alqabynyń jaǵalaý aımaǵyndaǵy qala halqy men ózenniń ekojúıesine qaýip tóndirgen eski ormannyń ornyn tazalaýǵa atsalysty. Odan bólek, jobanyń basty kezeńi ózen jaǵasyna turaqty baqylaý júrgizý bolyp tabylady. Bul ekojúıedegi ózgeristerdi baǵalaý negizin qalyptastyrady jáne tıimdi ári arzan ekologııalyq sheshimderdi jasaýǵa múmkindik beredi», - dep pikir bildirdi «Jas gvardııa» QQ dırektory ıÝrıı Dovgalenko.
Aıta keteıik, 2012 jyldan beri Ertis ózeniniń jaǵalaýyn tazalaý naýqany jyl saıyn ótkizilip keledi.
