Qazaqstannyń jasóspirimder quramasy Berlınde ótetin konkımen jarysýdan álem kýbogynyń fınalyna qatysady
ASTANA. Naýryzdyń 4-i. QazAqparat /Ernur Aqanbaı/ - Naýryzdyń 5-i men 7-si aralyǵynda Germanııanyń Berlın qalasynda jasóspirimder arasynda konkımen jarysý sportynan álem kýbogynyń fınaly ótedi.
Oǵan Qazaqstannyń jasóspirimder quramasy da qatysady, dep habarlaıdy QazAqparat.
«Bizdiń sport» saıtynyń málimetinshe, jerlesterimiz Ekaterına Aıdova men Alekseı Bondarchýktyń jasóspirimder arasynda álem chempıony atanýǵa tamasha múmkindikteri bar. Bul sportshylar álem kýbogynyń úsh kezeńiniń qorytyndysy boıynsha kósh basynda keledi.
«Ulttyq quramanyń músheleri Roman Krech, Denıs Kýzın jáne Aleksandr Jıgın qazir Germanııanyń Erfýrt qalasynda. Bul qalada osy demalys kúnderi sprıntten álem kýbogy ótedi. Odan keıin naýryzdyń 12-si men 14-i kúnderi Gollandııanyń Herenveın qalasynda álem kýbogynyń fınaly ótedi. Onda árbir qashyqtyqta 24-ten kóp emes qatysýshylar júgiredi. Sportshylar maýsymnyń birinshi jartysynda bolǵan álem kýbogynyń bes kezeńinde jınaǵan upaılary boıynsha suryptalady. Álem kýbogynyń fınalyna bizdiń quramanyń kóshbasshysy Denıs Kýzın qatysatyny daý týdyrmaıdy. Ol 1500 metrge jarysýdan 20-shy nátıje kórsetti. Sondaı-aq, osy demalys kúnderi sprınttik jarysta júldeger atanǵan jaǵdaıda álem kýbogynyń fınalyna Roman Krech pen Aleksandr Jıgın de qatysatyn bolady. Eger olar sprınttik jarysta júlder atanbasa, onda elge oralyp, odan soń Qazaqstan chempıonatyna daıyndalý úshin Chelıabige barady. Konkımen júgirý sportynan Qazaqstan chempıonaty naýryzdyń sońynda ótedi», delingen taratylǵan habarlamada.
