Qazaqstannyń jas ziltemirshileri 2020 jylǵy Olımpıadaǵa daıyndalýda
ASTANA. QazAqparat - QR Aýyr atletıka federatsııasy Dopıngke qarsy ortalyqpen birlesip, 2020 jyly Tokıoda ótetin Olımpıada oıyndarynda elimizdiń atynan óner kórsetýi múmkin jas sportshylarǵa semınar-trenıng ótkizdi. Bul týraly QazAqparat tilshisine federatsııa baspasóz qyzmetinen málim etti.
«Dopıng tek qana abyroıdy tógip qana qoımaı, sporttaǵy keleńsizdikke de boı aldyrtady. Ádil ári taza kúres qana jeńiske jetý sátinen lázzat alyp, jarystarǵa qatysýǵa múmkindik beredi», - dedi jas sportshylarǵa sóz arnaǵan QR Aýyr atletıka federatsııasynyń bas hatshysy Omar Mustafın.
Semınar bar barysynda mamandar jas sportshylarǵa ádil kúrestiń negizgi ustanymdary men dopıng qaýipi jaıynda aıtyp berdi. Aıta keterligi, endigi ýaqytta mundaı semınar aı saıyn ótkiziletin bolady. Kelesi shara naýryz aıyna josparlanǵan.
Esterińizge sala keteıik, sońǵy aılarda shekteý qoıylǵan preparattardy paıdalandy degen kúdikpen jas ziltemirshilerimiz Igor Son men Tatıana Kapýstına 2015 jyly ótken jasóspirimder arasyndaǵy álem chempıonatynyń medalinen qaǵylǵan bolatyn. Degenmen, elimizdiń Aýyr atletıka federatsııasynyń aralasýymen olardyń kinási joq ekendigi dáleldendi. Sportshylar bıologııalyq belsendi qospalardyń ornyna sportta shekteý qoıylǵan sýbstantsııany paıdalanǵandaryn bilmegen. Sportshylar qazirgi ýaqytta jattyǵýlaryn jalǵastyryp, aldaǵy jarystarǵa daıyndyq júrgizýde.
2015 jylǵy aýyr atletıkadan álem chempıonatynda júldeger atanǵan sportshylarymyzǵa qatysty tergeý amaldary jalǵasýda. Este bolsa, Almas Óteshov, Jasulan Qydyrbaev jáne Ermek Ómirtaı dopıngke qarsy erejeni buzdy degen kúdikpen halyqaralyq jarystarǵa qatysý quqyǵynan ýaqytsha shettetilgen edi. Amerıkanyń Hıýston qalasynda ótken álem chempıonatynan keıin sportshylardan alynǵan «A» synamasynan tyıym salynǵan androgendik seroıdtar tabylǵan.
QR aýyr atletıka federatsııasy dopıng-tergeý nátıjeleri taıaý 2 aıdyń ishinde belgili bolatyndyǵyna úmit artýda.
