Qazaqstannyń jas ulandary Jańa jyldyq shyrshaǵa qatysty (FOTO)
ASTANA. QazAqparat - Jańa jyldyq mereke jáne demalys qarsańyndaǵy eń keremet merekelik is-sharalardyń biri - QR Qorǵanys mınıstriniń jańa jyldyq shyrshasy. Bul is-shara elordanyń tórinde ornalasqan «Saltanat saraıynda» armııa generaly, Halyq qaharmany Saǵadat Nurmaǵambetov atyndaǵy «Jas ulan» respýblıkalyq mektebi tárbılenýshileriniń, sondaı-aq alǵash ret osy jyly QR Qorǵanys mınıstrliginiń qaramaǵyna berilgen Almaty, Shymkent, Qaraǵandy qalalaryndaǵy úsh áskerı mektep-ınternattary tárbıelenýshileriniń basyn biriktirdi, dep habarlady QR Qorǵanys mınıstrliginiń baspasóz qyzmetinen.
Meıramǵa 8-11 synyptyń 58 ulany qatysty. Bul balalardyń barlyǵy qamqorlyqta jáne balalar úıiniń tárbıelenýshileri bolyp keledi. Merekelik is-sharaǵa meıman retinde qyz balalar, Astana qalasy mektepteri men lıtseıleriniń oqýshylary shaqyryldy.
QR QK Bas shtaby bastyǵynyń orynbasary - QR QK BSh Tárbıe jáne ıdeologııalyq jumystar departamentiniń bastyǵy general-maıor Muhamedjan Talasov ulandardy kele jatqan 2016 jylmen quttyqtady.
«Biz 2015 jyldy qorytyndylap, aldaǵy keler jylǵa mindetter qoıamyz. 2015 jyl biz úshin jaqsy, jemisti jyl boldy. Memleket basshysynyń tapsyrmasy boıynsha Qorǵanys mınıstrliginiń qataryna Almaty, Qaraǵandy jáne Shymkent shaharlaryndaǵy áskerı msktep-ınternattary qosyldy. Sender bilim nárin sýsyndap, olımpıadalarǵa belsene qatysyp, júldeli oryndarǵa ıe boldyńdar. QR Qorǵanys mınıstriniń atynan men senderdi kele jatqan Jańa jyldaryńmen shyn júrekten quttyqtaımyn. Myqty densaýlyq, jańa jetistikterge jetýlerine tilektespin. Oqyńdar, bilim alyndar jáne sol kezde sáttilikke qol jetkizip, bıik shyńdardy baǵyndyrasyńdar», - dedi M.Talasov. Áskerı mektep tárbıelenýshileri men merekege jınalǵan qonaqtarǵa arnalyp kontserttik baǵdarlama jáne syılyqtar ázirlendi, merekelik dastarhan jaıyldy. «Osyndaı merekelik is-shara uıymdastyrǵany úshin Qorǵanys mınıstrligine alǵysymdy bildiremin. Osy jyl barlyǵymyz úshin erekshe jyl boldy. Sebebi, biz ulan atandyq. Biz úkilegen úmitterińizdi aqtap, ynta-jigermen bilim alamyz, eńbek etemiz jáne Sizdiń isińizdi jalǵastyryp, Qazaqstanymyzdyń táýelsizdigin saqtaý úshin áskerı ilimdi ıgeremiz», - dep QR QM Sabyr Raqymov atyndaǵy Shymkent qalasy «Jas ulan» respýblıkalyq mektebiniń 11-synyp ulany Qydyr Álibek rızashylyǵyn bildirdi.
